Фарғона НҚИЗда авиация ёқилғиси ишлаб чиқариш ҳажми оширилди
Авиация транспортининг барқарор ишлашида сифатли ёқилғи таъминоти муҳим аҳамиятга эга. Шу боис маҳаллий корхоналарда замонавий талабларга жавоб берадиган авиакеросин ишлаб чиқаришни кўпайтиришга алоҳида эътибор қаратилмоқда.
Фарғона нефтни қайта ишлаш заводида ҳам бу йўналишда ишлаб чиқариш кўрсаткичлари оширилган. Завод ахборот хизматининг маълум қилишича, август ойида режалаштирилган 7,8 минг тонна ўрнига 11,2 минг тонна авиакеросин ишлаб чиқарилган. Натижада ойлик режа 143,6 фоизга бажарилган.
Жорий йилнинг январь-июль ойларида заводда 15,8 минг тонна авиакеросин ишлаб чиқарилган бўлса, август ойидаги ҳажм ўртача ойлик кўрсаткичга нисбатан беш баробарга ошган.
Корхонада синтетик GTL керосинидан фойдаланган ҳолда JET A-1 русумли авиакеросин ишлаб чиқариш бўйича илмий-тадқиқот ва квалификацион синовлар ҳам якунланган. Маҳсулотни ишлаб чиқариш учун зарур рухсат берувчи ҳужжатлар олинган.
Ишлаб чиқариш ҳажми оширилгани инобатга олиниб, йиллик мақсадли кўрсаткич 74,0 минг тоннадан 85,6 минг тоннага кўтарилган. Бу дастлабки режадан 11,6 минг тонна ёки 15,7 фоизга кўп.
Корхона ҳисоб-китобларига кўра, ишлаб чиқариш ҳажмининг оширилиши маҳсулот реализациясидан қўшимча 164 миллиард сўм даромад олиш имконини беради.
Н.Зиёдуллаева,
ЎзА
