Эски уйларга янги қиёфа, ҳудудларга янги нафас кириб бормоқда (+видео)
Кўп квартирали уйларда муносиб яшаш шароити деганда, аввало, хонадоннинг ўзи эмас, балки инсон ҳар куни фойдаланадиган бутун муҳит назарда тутилади. Обод ҳовли, таъмирланган ички йўл, замонавий болалар майдончаси, соз ирригация тармоғи, хавфсиз кириш қисми ва энергия самарадор бинолар — буларнинг барчаси аҳоли турмуш сифатига бевосита таъсир қилади.
Бугун Тошкент вилоятида бу тушунчага янгича ёндашилмоқда. Президентнинг 2026 йил 5 февралдаги ПҚ-48-сонли қарори асосида кўп квартирали уйлар атрофидаги ҳудудларни комплекс янгилаш, инфратузилмани модернизация қилиш ва аҳоли учун қулай муҳит яратишга қаратилган ишлар кенг тус олмоқда.
Бу жараённи Чирчиқ шаҳри мисолида яққол кўриш мумкин. Шаҳардаги 972 та кўп қаватли уйда 38 минг 700дан ортиқ хонадон мавжуд. Бу ерда нафақат уйлар атрофи ободонлаштирилмоқда, балки ички йўллар ва ирригация тармоқлари таъмирланмоқда, янги болалар майдончалари барпо этилмоқда, эски биноларнинг фасад ва том қисмлари янгиланмоқда. Аҳоли хавфсизлигини таъминлаш мақсадида домофонлар ўрнатилмоқда.
Маълумот ўрнида айтиш жоиз, 2026 йилда Тошкент вилоятида қарор ижроси доирасида 46 та объектда комплекс ободонлаштириш ва модернизация ишларини амалга ошириш учун 70,845 миллиард сўм маблағ йўналтирилган.
Маблағлар ички йўлларни таъмирлаш, болалар майдончаларини барпо этиш, ирригация тармоқларини тиклаш, умумий фойдаланишдаги инфратузилма объектларини қуриш ва реконструкция қилиш ҳамда ҳудудларни ободонлаштиришга сарфланмоқда. Муҳими, 46 та объектнинг барчаси бўйича лойиҳа-смета ҳужжатлари ишлаб чиқилган. Шундан 42 таси бўйича Шаҳарсозлик ҳужжатларини экспертиза қилиш давлат муассасасининг ижобий хулосаси олинган. Қолган 4 та объект ҳужжатлари экспертиза жараёнида.
Ижобий хулоса олинган 42 та объектнинг 30 тасида қурилиш-пудрат ташкилотлари аниқланиб, ишлар бошланган. 10 та объект бўйича эълонлар «Шаффоф қурилиш» онлайн электрон платформасига жойлаштирилган. Яна 2 та объект бўйича эълонларнинг якуний муддати 25 август этиб белгиланган. Айни пайтда вилоят бўйича қурилиш-монтаж ишларининг умумий бажарилиш даражаси қарийб 40 фоиз. Натижалар ҳудудлар кесимида ҳам сезиларли. Чиноз туманида ишлар 90 фоизга, Ангрен шаҳрида 60 фоизга, Оҳангарон туманидаги объектлардан бирида 70 фоизга бажарилган. Чирчиқда бу кўрсаткич 30 фоиз, Қибрайда 20 фоиз, Паркентда эса 15 фоизни ташкил этмоқда.
Чирчиқ шаҳридаги ишлар лойиҳалар кўлами ва аҳоли қамрови жиҳатидан алоҳида эътиборга молик. Шаҳардаги 972 та кўп қаватли уйда 38 минг 700 дан ортиқ хонадон истиқомат қилади. Уларга 15 та бошқарув сервис компанияси хизмат кўрсатмоқда. Мавжуд режаларга кўра, кўп квартирали уйларга туташ ҳудудларда 23 та болалар майдончаси барпо этилади. Шунингдек, 1 800 погон метр ирригация тармоғи таъмирланиб, тикланади. Яна 1 000 погон метр ички йўл таъмирланади. Бу рақамлар ортида минглаб аҳолининг кундалик ҳаётидаги ўзгаришлар мужассам.
Чирчиқдаги янгиланишлар ҳовлилар билан чекланмаяпти. Биноларнинг ўзи ҳам таъмирланмоқда. Шаҳарнинг «Тинчлик» маҳалла фуқаролар йиғини ҳудудида 1965 йилда қурилган 77 та кўп қаватли уй бор. Уларнинг айримларида фасад ва том қисмларини таъмирлаш, иссиқлик энергияси самарадорлигини оширувчи замонавий қурилиш материалларидан фойдаланиш ишлари олиб борилмоқда.
Ҳозирга қадар мазкур ҳудуддаги 3 та кўп қаватли уйнинг фасад ва том қисмлари таъмирланган. Таъмирлаш ишлари уларнинг техник ҳолатини мустаҳкамлаш ва иссиқликни сақлаш самарадорлигини оширишга ҳам хизмат қилади.
Чирчиқ шаҳрида «Хавфсиз шаҳар» дастури доирасида кўп қаватли уйларнинг кириш қисмларига 165 та домофон ўрнатилган. Дастурнинг иккинчи босқичи якунланган. Айни пайтда учинчи босқич доирасида яна 169 та домофон ўрнатиш ишлари давом этмоқда. Бу чоралар умумий фойдаланишдаги ҳудудларда хавфсизликни кучайтириш, бегона шахсларнинг киришини чеклаш ва аҳоли хотиржамлигини таъминлашга қаратилган.
Қарор доирасида амалга оширилаётган лойиҳаларнинг аҳамиятини фақат қурилиш ҳажми ёки сарфланаётган маблағ билан баҳолаб бўлмайди. Уларнинг асосий натижаси одамларнинг кундалик ҳаётида намоён бўлади. Таъмирланган йўл — қулай ҳаракат. Янги болалар майдончаси — болалар учун хавфсиз муҳит. Тикланган ирригация тармоғи — обод ҳудуд. Таъмирланган фасад ва том — биноларнинг мустаҳкамлиги ва энергия самарадорлиги. Домофон эса — қўшимча хавфсизлик. Тошкент вилоятидаги 46 та объектда амалга оширилаётган ишлар ана шу оддий, аммо муҳим эҳтиёжларни бир тизимга бирлаштирмоқда.
Энг муҳими, бу жараён кўп квартирали уйларнинг ташқи қиёфасини ўзгартириш билан чекланиб қолмай, аҳоли учун қулай, хавфсиз ва замонавий яшаш муҳитини шакллантиришга хизмат қилмоқда.
Чирчиқ мисолида бошланган ва вилоятнинг бошқа ҳудудларида давом этаётган бу янгиланишлар якунига етказилгани сари эски турар жой массивлари янги қиёфа касб этиб, уларга янги ҳаёт нафаси кириб боради.
<iframe width="560" height="315" src="https://www.youtube.com/embed/u7SxbwPayFs?si=LISc3la2QhLh25JD" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Шаҳноза Маматуропова,
Нишонбой Абдувоитов (видео),
ЎзА
