Енгил атлетикачиларимиз Осиё чемпионатида умумжамоада иккинчи ўринда

Хитойнинг Ордос шаҳрида енгил атлетика бўйича U23 ёш тоифасида ўтаётган Осиё чемпионатининг ортда қолган учинчи кунги мусобақаларидан кейин Ўзбекистон терма жамоаси аъзолари 12 та медални қўлга киритган ҳолда умумжамоада Хитойдан кейин иккинчи ўринни эгаллаб турибди.

Маҳоратли енгил атлетикачиларимиздан Жонбиби Ҳукмова 800 метр ва 400 метр масофага белгиланган баҳсларда олтин медалларга эгалик қилган бўлса, Валерия Горбатова баландликка сакраш дастурида қитъанинг тенгсиз спортчиси номига сазовор бўлди.

Шунингдек, Барнохон Сайфуллаева, Айюбхон Фаёзов, Иброҳим Маҳкамов сингари спортчиларимиз томонидан қўлга киритилган кумуш ва бронза медаллари чемпионатда қатнашаётган 20 дан зиёд давлат орасида Ўзбекистон спорт делегациясининг муносиб ўрни борлигини кўрсатди.

Умумжамоа ҳисобида Хитой терма жамоаси 19 та олтин, 12 кумуш ва 5 та бронза медали билан етакчилик қилмоқда. 2-ўринда бораётган Ўзбекистон терма жамоаси ҳисобида 3 та олтин, 5 та кумуш, 4 та бронза медаллари мавжуд. 3 тадан олтин ва кумуш, 1 та бронза медалига эга Япония терма жамоаси аъзолари кучли учликка якун ясаган.

Бугун, 12 июль куни чемпионатнинг сўнгги кунги мусобақалари бўлиб ўтади.

Т.Рўзиев, ЎзА