Дзюдо: Осиё чемпионатида бир йил муқаддам қайд этилган кўрсаткич яхшиланди

Иордания пойтахти Амман шаҳрида дзюдо бўйича ўсмирлар ўртасида ўтказилган Осиё чемпионатида Ўзбекистон терма жамоаси аъзолари умумжамоада 1-ўринни эгаллади.

Икки кун давом этган қитъа биринчилигида Ўзбекистон ўсмирлар терма жамоаси 11 та олтин, 4 та кумуш, 5 та бронза, жами 20 та медаль билан Осиёнинг 20 та давлати орасида умумжамоада етакчи бўлди.

Иккинчи ўриндан жой олган Қозоғистон терма жамоаси 2 та олтин, 7 та кумуш, 6 та бронза медалини қўлга киритган бўлса, кучли учликка якун ясаган эронлик дзюдочи ёшлар 2 та олтин ва 2 та бронза медалига сазовор бўлди.

Айтиш лозим, ўтган йили 21 та давлат вакиллари иштирокида Индонезияда ташкил этилган Осиё чемпионатида Ўзбекистон ўсмирлар терма жамоаси 7 та олтин, 3 та кумуш, 8 та бронза, жами 18 та медаль билан умумжамоа ҳисобида 1-ўринни банд этган эди.

Бу йилги қитъа чемпионатида ўсмир дзюдочиларимизнинг медаллар сифатидаги кўрсаткичи олтин медаллар ҳисобига анча яхшиландики, бу, юртимизда янги-янги иқтидорлар етишиб чиқаётганидан далолат дейиш мумкин.

Т.Рўзиев, ЎзА