БМТ Бош котиблиги учун кураш давом этяпти
Туркия Европада хавфсизлик ва ҳамкорлик ташкилоти (ЕХҲТ) Бош котиби Феридун Ҳоди Синирли ўғлини БМТ Бош котиби лавозимига номзод сифатида кўрсатди.
Маълумки, Бирлашган Миллатлар Ташкилоти Бош Ассамблеяси Президенти ва Хавфсизлик Кенгаши Раисининг 2025 йил 25 ноябрдаги қўшма хати билан БМТнинг кейинги Бош котиби лавозимига танлов жараёни расман бошланган эди. Шунга асосан, Туркия Республикаси Президенти Режеп Таййип Эрдоған ташкилот етакчилигига Элчи Феридун Ҳоди Синирли ўғли номзод этиб кўрсатилган мактуб юборган. Бу ҳақда “РИА Новости” агентлиги ихтиёрига келиб тушган ҳужжатда қайд қилинган.
Таъкидланишича, ушбу номзод илгари сурилиши билан боғлиқ харажат шахсий маблағ ҳисобидан қопланади.
Синирли ўғли ҳозир ЕХҲТ Бош котиби лавозимида ишлайди. 2016-2023 йиллари Туркиянинг БМТдаги доимий вакили эди.
Айни пайт БМТ ХК томонидан аъзолари Бош котибликка номзодни аниқлаш ва даъвогарларни Низомга мувофиқ расман раҳбарни тайинлайдиган Бош Ассамблеяга тавсия қилиш учун дастлабки овоз бериш жараёни ташкил қилинган. Тез орада навбатдаги босқич ўтказилади.
Аввалроқ Коста-Рика собиқ вице-президенти, БМТ Савдо ва тараққиёт бўйича конференцияси (UNCTAD) раҳбари Ребека Гринспан дастлабки овоз беришнинг еттинчи босқичидан сўнг етакчиликни сақлаб тургани маълум қилинган. Кейинроқ Халқаро атом энергияси агентлиги (МАGАТE) бош директори, аргентиналик Рафаэль Гросси 9 овоз (4 қарши, 2 бетараф) олиб, иккинчи поғонага кўтарилган. Кейинги ўринда 8 қўллов (6 қарши, 1 бетараф) билан Гаянанинг БМТдаги элчиси Кэролин Родригес-Биркетт боряпти.
Бош котибликка асосий номзод сифатида кўрилаётган Лана Нусайба сўнгги овоз беришда кутилганидан паст натижа кўрсатган.
Бирлашган Араб Амирликлари юқори лавозимли дипломати, давлат вазири бўлмиш мазкур сиёсатчи ўтган ҳафта номзодлигини эълон қилганда кўпчилик уни пойга етакчиси сифатида баҳолаган эди.
Нусайба 2013-2024 йиллар оралиғида БААнинг БМТдаги доимий вакили бўлиб ишлаган. У айни лавозимни эгаллаган илк аёл сифатида тарихга кирган.
Амалдаги Бош котиб Антониу Гутерришнинг иккинчи ва охирги ваколати муддати 31 декабрда тугайди.
С.Раҳимов, ЎзА
