Айрим соҳалардаги тадбиркорларга 70,9 миллиард сўмлик ҚҚС қайтарилди
Ўзбекистонда тадбиркорлик субъектларини қўллаб-қувватлаш, уларнинг молиявий барқарорлигини таъминлаш ва бизнес юритиш учун янада қулай шароит яратиш мақсадида бир қатор солиқ имтиёзлари жорий этилмоқда.
Ана шундай механизмлардан бири — бюджетга тўланган қўшилган қиймат солиғининг (ҚҚС) бир қисмини тадбиркорларга қайтариш амалиёти ҳисобланади.
Давлат томонидан кўрсатилаётган мазкур қўллаб-қувватлаш чоралари туризм, меҳмонхона хизмати, умумий овқатланиш, чорвачилик, паррандачилик ҳамда заргарлик соҳаларида фаолият юритаётган тадбиркорлик субъектларининг молиявий имкониятларини кенгайтиришга хизмат қилмоқда.
2026 йил 5 июнь ҳолатига кўра, ушбу тизим доирасида жами 70,9 миллиард сўм маблағ тадбиркорларга қайтарилди.
Хусусан, 19 та туроператорга — 539,8 миллион сўм, 121 та меҳмонхонага 3,5 миллиард сўм қайтарилди. Шунингдек, 736 та умумий овқатланиш корхонасига 46 миллиард сўм, 28 та чорвачилик ва паррандачилик хўжалигига 1,1 миллиард сўм, 269 та заргарлик корхонасига 19,8 миллиард сўм ҚҚС маблағи қайтарилди.
Таҳлилларга кўра, қайтарилган маблағлар тадбиркорларнинг айланма маблағларини тўлдириш, ишлаб чиқариш ва хизмат кўрсатиш ҳажмини ошириш, янги лойиҳаларни амалга ошириш ҳамда қўшимча иш ўринлари яратиш имкониятларини кенгайтирмоқда.
Қайд этиш жоизки, сўнгги йилларда иқтисодиётнинг хизмат кўрсатиш ва ишлаб чиқариш соҳаларини рағбатлантириш, хусусий сектор улушини кенгайтириш ҳамда тадбиркорлик фаолиятини қўллаб-қувватлаш давлат сиёсатининг устувор йўналишларидан бири бўлиб қолмоқда. ҚҚСнинг бир қисмини қайтариш амалиёти эса мазкур мақсадларга эришишда муҳим иқтисодий механизмлардан бири сифатида хизмат қилмоқда.
Ш.Маматуропова,
ЎзА
