Ашёвий далиллар билан қўлга олинди
Коррупцияга қарши курашиш, давлат хизматида қонунийлик ва шаффофликни таъминлаш, мансаб ваколатларини суиистеъмол қилишга нисбатан муросасиз муносабатни қарор топтириш мамлакатимизда давлат сиёсатининг устувор йўналишларидан бирига айланган. Бу борада ҳуқуқни муҳофаза қилувчи органлар томонидан амалга оширилаётган изчил тезкор тадбирлар нафақат жиноятларнинг олдини олиш, балки давлат идораларига нисбатан жамоатчилик ишончини мустаҳкамлашга ҳам хизмат қилмоқда.
Навбатдаги тезкор тадбир давомида Жиззах вилояти Инвестициялар ва ташқи савдо бошқармаси ходими ер ажратиб бериш масаласини ҳал этиш эвазига талаб қилинган 1000 АҚШ долларининг қолган 900 АҚШ долларини олаётган вақтида ҳуқуқни муҳофаза қилувчи органлар ходимлари томонидан ашёвий далиллар билан қўлга олинди.
Дастлабки маълумотларга кўра, ушбу маблағ элит типдаги конструкцияли савдо дўкони учун ер ажратишда ҳокимият тизимидаги алоқалари орқали кўмаклашишни ваъда қилгани эвазига талаб қилинган.
Айни пайтда мазкур ҳолат юзасидан терговга қадар текширув ҳаракатлари олиб борилмоқда. Барча ҳолатларга қонунчиликда белгиланган тартибда ҳуқуқий баҳо берилиши таъкидланмоқда.
Бу каби ҳолатлар мансаб ваколати шахсий манфаат манбаи эмас, балки халқ ишончи ва масъулияти эканини яна бир бор эслатади. Порахўрлик ва ҳар қандай коррупциявий қилмиш нафақат қонунни бузади, балки давлат бошқарувининг очиқлигига, адолат тамойилларига ва жамиятнинг тараққиётига ҳам жиддий путур етказади. Бежиз халқимизда “Ҳаромдан келган — ҳаромга кетар” деган нақл авлоддан авлодга ўтиб келмаган.
Мамлакатимизда коррупцияга қарши курашиш тизими изчил такомиллаштирилмоқда. Бу йўналишда қабул қилинаётган ҳуқуқий ҳужжатлар давлат хизматида ҳалоллик, очиқлик ва ҳисобдорлик тамойилларини янада мустаҳкамлашга хизмат қиляпти. Хусусан, Президентимизнинг 2025 йил 21 апрелда қабул қилинган “Коррупцияга қарши курашиш тизимини янада такомиллаштириш бўйича белгиланган устувор вазифалар ижросини самарали ташкил этишга доир чора-тадбирлар тўғрисида”ги Фармони соҳада профилактик чораларни кучайтириш, мансаб ваколатларидан шахсий манфаат йўлида фойдаланишга қарши таъсирчан механизмларни жорий этиш ҳамда коррупцияга нисбатан мутлақо муросасиз муҳитни шакллантиришга қаратилган.
Қонун устуворлиги таъминланган жамиятда ҳеч бир ҳуқуқбузарлик жазосиз қолмайди. Ҳар бир ноқонуний хатти-ҳаракатга ҳуқуқий баҳо берилиши, айбдорларнинг жавобгарлиги муқаррарлиги таъминланиши коррупцияга қарши кураш самарадорлигини янада ошириш, давлат хизматида ҳалоллик муҳитини қарор топтириш ва халқ ишончини мустаҳкамлашнинг энг муҳим омилларидан бири бўлиб қолмоқда.
Абдужалол Қаюмов, ЎзА мухбири
