АҚШ ҳукумати “Титаник” артефактлари сотилишига қарши
Яқинда очилган суд ҳужжатига кўра, “Титаник” ҳалокатидан бутун қолган 100 дан зиёд ашё, жумладан шахсий буюм, валюта, ошхона анжоми ва турли безакларни "Ким ошди савдоси"да сотиш режаси АҚШ ҳукумати қаршилигига дуч келди.
Шимолий Атлантикада ҳалокатга учраган машҳур кемани қутқариш бўйича эксклюзив ҳуқуққа эга “RMS Titanic Inc.” компанияси фақат музей ёки кўчма кўргазмада намойиш этилиши мумкинлиги ҳақидаги аввалги келишувга қарамай, мавжуд артефактларни сотиш ҳаракатига тушиб қолди.
АҚШ манфаатини ифода этувчи ва машъум воқеа жойини назорат қилувчи Миллий океан ва атмосфера бошқармаси (NOAA) бундай савдо туфайли “Титаник” билан боғлиқ қонуний мажбурият бузилишини даъво қилмоқда.
Ўнлаб йил давомида корхона келажакдаги тадқиқотни молиялаштириш учун буюмларни сотишга ҳаракат қилган. Уринишлар эса Америка суди, маданий мерос гуруҳлари ва қурбонларнинг қариндошлари томонидан қатъий қаршиликка учради.
С.Раҳимов, ЎзА
