“Apple” бозор қиймати бўйича яна жаҳонда етакчиликка чиқди
“Apple” компанияси “Nvidia’ни ортда қолдириб, яна дунёнинг энг қиммат бренди мақомини қайтариб олди.
Сунъий интеллект соҳасидаги катта харажатлар оқланмаслигидан хавотирланган инвесторлар нисбатан хавфсизроқ ҳисобланган “Apple”га сармоя киритишни афзал кўрмоқда. Натижада “Apple”нинг бозор қиймати 5,03 триллион долларни, “Nvidia”ники эса 4,93 триллион долларни ташкил этди.
Бозордаги бу ўзгариш “Intel”, “Amazon”, “Alphabet” ва “Meta” каби гигантларнинг сунъий интеллектга йўналтирган улкан харажатлари кутилган молиявий натижани бермагани оқибатида юз берди. Аксинча, СИ инфратузилмасига ортиқча сармоя киритишдан тийилган “Apple” жорий йилда ўз акцияларини 27 фоиз оширишга эришди.
Харажатлар ҳаддан ташқари ортгани сабабли “Alphabet” ва “Amazon” каби компанияларнинг эркин пул оқими манфий кўрсаткичга тушиб, уларни қарз олишга мажбур қилмоқда. “Apple’да эса, аксинча, эркин пул оқими 38 фоизга ошиб, 142 миллиард долларга етиши кутилмоқда. Ушбу умумий беқарорлик фонида технологик секторни акс эттирувчи “Nasdaq100” индекси октябрь ойида 6,7 фоизга, “Intel” акциялари эса 45 фоиздан ортиққа пасайди.
Ф.Яхшибоева, ЎзА
