Анвар Анваров — Осиё чемпиони!
Хитойнинг Чунсин шаҳрида енгил атлетиканинг сакраш турлари бўйича илк Осиё чемпионати доирасида эркаклар ўртасидаги узунликка сакраш баҳслари якунланди.
Қувонарлиси, ушбу нуфузли мусобақада Ўзбекистон терма жамоаси вакили Анвар Анваров юксак натижа қайд этиб, қитъа чемпиони деган шарафли номга сазовор бўлди. Ҳамюртимиз финал баҳсларида 8.06 метр натижа кўрсатиб, барча рақибларини ортда қолдирди ва Осиё чемпионатининг олтин медалини қўлга киритди.
Эътиборли жиҳати, спортчимиз сўнгги уч кун ичида кетма-кет икки йирик халқаро мусобақада иштирок этиб, ҳар иккисида ҳам совриндорлар сафидан жой олди.
Эслатиб ўтамиз, Хитойнинг Шанхай шаҳрида енгил атлетика бўйича “Brilliant Liga” мусобақасининг илк босқичида Анвар Анваров эркаклар ўртасидаги узунликка сакрашда 8.01 метр натижа қайд этиб, бронза медаль билан тақдирланган эди.
Жавоҳир Тошхўжаев, ЎзА
