Японияда қизилўнгач саратонига қарши дори ишлаб чиқилди
Токиода жойлашган “Oncolys BioPharma” компанияси томонидан ишлаб чиқилган ва қизилўнгач саратонини даволашга мўлжалланган дунёдаги биринчи онкологик препаратнинг тижорий савдоси тез орада бошланиши мумкин.
Таъкидланишича, ушбу инновацион восита таркибидаги генетик ўзгартирилган вируслар соғлом тўқималарга зарар етказмаган ҳолда, фақат ўсимта ҳужайраларини нишонга олади ва уларни ичкаридан емириб, организмда иммунитет жавобини пайдо қилади.
Хабарга кўра, компания ушбу препаратни бозорга олиб чиқиш учун Япониядаги мураккаб ва қатъий меъёрий талабларни енгиб ўтишига тўғри келди. Чунки вирус асосидаги дориларни тижорий миқёсда ишлаб чиқариш ва уларнинг клиник синовларини ўтказиш алоҳида ёндашув ҳамда юқори сифат назоратини талаб этади.
Ф.Яхшибоева, ЎзА
