Велотрекчиларимиз “Silk Way Series Astana 2026” да 3 та медални қўлга киритди
Қозоғистоннинг Остона шаҳрида велотрек бўйича “Silk Way Series Astana 2026” халқаро мусобақасининг иккинчи босқичи якунланди. Қувонарлиси, унда иштирок этган Ўзбекистон терма жамоаси вакиллари муваффақиятли иштирок этиб, 2 та кумуш ва 1 та бронза медалига сазовор бўлди.
Эркаклар ўртасидаги “омниум” дастурида юртимиз вакили Сергей Ростовцев юқори натижа қайд этиб, мусобақанинг кумуш медалини қўлга киритди. Мазкур йўналишда нейтрал мақомда қатнашган Илья Савекин ғолибликни қўлга киритган бўлса, қозоғистонлик Алишер Жумакан учинчи ўриндан жой олди.
Аёллар ўртасидаги “омниум” баҳсларида эса Ўзбекистон терма жамоаси аъзоси Нафосат Қозиева кучли учликдан ўрин эгаллаб, бронза медали соҳибасига айланди. Биринчи ва иккинчи ўринлар нейтрал мақомда иштирок этган Палина Конрад ҳамда Валерина Валгоненга насиб этди.
Шунингдек, ёш велопойгачиларимиз Самира Исмоилова ва Асал Ризаевадан иборат жуфтлик “Madison” дастурида муваффақиятли иштирок этди. Ҳамюртларимиз биринчи босқичдаги натижаларини яхшилаб, бу сафар кумуш медални қўлга киритди. Ушбу йўналишда қозоғистонлик Ангелина Буренкова ва Карина Абдураҳманова ғолиб деб топилди. Бронза медаллари эса Милана Котельникова ва Алина Ванглинская жуфтлиги ҳисобига ёзилди.
Жавоҳир Тошхўжаев, ЎзА
