«US Open»: Камилла Раҳимова дунёнинг энг кучли теннисчиси билан ўйнайди
Ўзбекистонлик теннисчи Камилла Раҳимова "US Open-2026" турнирида кейинги босқичга йўл олди. Энди у Арина Соболенкога қарши котга чиқади.
Америка Қўшма Штатларининг Нью-Йорк шаҳрида теннис бўйича «Катта дубулға» туркумига кирувчи «US Open-2026» турнири аёллар ўртасидаги яккалик баҳсларида мамлакатимизнинг биринчи рақамли теннисчиси Камилла Раҳимова муваффақиятли иштирок этмоқда.
Америка очиқ чемпионатининг иккинчи даврасида Камилла Раҳимова испаниялик Оксана Селехметовага қарши кортга чиқди. Учрашувнинг биринчи сетида теннисчимиз 6:3 ҳисобида ғалаба қозонган бўлса, иккинчи сетда рақибига бирорта ҳам геймни бой бермади — 6:0.
Шу тариқа, учинчи даврага йўл олган К.Раҳимова мусобақа якунига кўра 130 рейтинг очкоси ва 290 минг АҚШ доллари миқдоридаги пул мукофотини қўлга киритишни кафолатлади. Энди у навбатдаги босқичда дунёнинг биринчи рақамли теннисчиси, беларуслик Арина Соболенко билан куч синашади.
Эслатиб ўтамиз, «US Open-2026» турнирида яна бир теннисчимиз Мария Тимофеева ҳам иштирок этмоқда. У иккинчи даврада бельгиялик Элизе Мертенс билан куч синашади.
Жавоҳир Тошхўжаев,
ЎзА
