Трамп Эронга зарба бериш режасини бекор қилди
АҚШ президенти Дональд Трамп Эрон билан музокараларда ижобий силжиш кузатилганини айтиб, мамлакатга қарши режалаштирилган ҳарбий зарбаларни бекор қилганини маълум қилди, деб хабар берди DW нашри .
Трампнинг таъкидлашича, Эроннинг олий раҳбарияти билан олиб борилган музокаралар муайян келишувга эришиш имконини яратган. Шу сабабли у белгиланган ҳаво ҳужумларини тўхтатган.
Унинг сўзларига кўра, келишувнинг асосий шартлари нафақат АҚШ, балки Исроил, Саудия Арабистони, БАА, Қатар, Туркия, Покистон, Баҳрайн, Қувайт, Иордания ва Миср каби давлатлар билан ҳам мувофиқлаштирилган.
Трамп Ҳурмуз бўғозидаги денгиз блокадаси келишув имзолангунига қадар сақланиб қолишини билдирди. Ҳужжатни имзолаш вақти ва жойи яқин кунларда маълум қилиниши кутилмоқда.
Трамп журналистлар билан мулоқотда Эрон билан келишув шу ҳафтанинг охирида Европада имзоланиши мумкинлигини айтди. Унинг айтишича, АҚШ вице-президенти Жей Ди Вэнс имзолаш маросимида қатнашиши мумкин.
Трампнинг фикрича, мазкур келишув Эроннинг ядровий қуролга эга бўлишига йўл қўймайди ва Ҳурмуз бўғози қайта очилишига хизмат қилади.
Эрон Ташқи ишлар вазирлиги матбуот котиби Исмоил Бақоийнинг маълум қилишича, Теҳрон ҳозирча АҚШ билан келишув бўйича якуний қарор қабул қилмаган.
<iframe width="412" height="732" src="https://www.youtube.com/embed/B49f-4ns-YU" title="Tramp Eronga zarba berish rejasini bekor qildi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Салимжон Обиджонов, ЎзА
