Сергей Фомин Хитойда чорак финалга йўл олди

Хитойда Халқаро теннис федерацияси томонидан ўтказилаётган М25 таснифидаги турнирда ҳамюртимиз Сергей Фомин яккалик ва жуфтлик баҳсларида иштирок этмоқда.

Аниқроқ айтадиган бўлсак, Сергей Фомин яккаликлар ўртасидаги илк босқичда нейтрал теннисчи Сергей Петровни 6:3, 6:2 ҳисобида таслим этган бўлса, иккинчи даврада италиялик Александр Бинда билан рақобатлашди ва 6:3, 5:7, 6:3 ҳисобида ғалаба қозонди.

Шунингдек, Сергей Фомин жуфтлик беллашувларида қозоғистонлик Григорий Ломакин билан тандем ҳосил қилди ва улар биринчи даврада мезбон теннисчилари Ксан Фенг Чен ва Аоран Ванг дуэтини ҳар иккала сетда бир хил 6:4 ҳисобида енгди. Энди Сергей ва Григорий чорак финалда нейтрал теннисчи Данил Остапенко ва АҚШ вакили Мишэль Жу жуфтлигини синовдан ўтказади.

Афсуски, мазкур мусобақада иштирок этган Ҳумоюн Султонов ва Максим Шин каби теннисчиларимиз яккалик баҳсларининг биринчи даврасида муваффақиятсизликка учради.

Жавоҳир Тошхўжаев,

ЎзА