Сенат: қурилиш соҳасида давлат назорати кучайтирилади
Сенатнинг Бюджет ва иқтисодий масалалар қўмитасининг мажлисида “Қурилиш соҳасида давлат назорати ва бошқаруви янада такомиллаштирилиши муносабати билан Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида”ги қонун дастлабки тарзда муҳокама этилди.
Кейинги йилларда мамлакатимизда қурилиш соҳаси жадал ривожланиб, кўп квартирали уйлар қурилиши кескин ошгани қайд этилди.
Сенаторлар қурилиш соҳасидаги давлат назорати ва бошқарувини янада такомиллаштириш, бинолар ва иншоотларнинг зилзилабардошлиги ва сейсмик хавфсизлигини кучайтириш зарурати юзага келаётганини таъкидлади.
Зеро, талафотли зилзилалар юз бериши аҳоли ҳаётига ҳамда мамлакатларнинг ижтимоий-иқтисодий инфратузилмаларига жиддий хавф солади.
Қонун билан Жиноят ва Маъмурий жавобгарлик тўғрисидаги кодексларга ўзгартириш ва қўшимчалар киритилиб, кўп квартирали уйларни Вазирлар Маҳкамаси ҳузуридаги Қурилиш ва уй-жой коммунал хўжалиги соҳасида назорат қилиш инспекциясининг рухсатномасисиз қурганлик учун жавобгарлик кучайтирилмоқда.
Бундан ташқари, мазкур инспекциянинг сейсмик хавфсизликни таъминлаш соҳасидаги ваколатлари аниқлаштирилиб, шаҳарсозлик ҳужжатлари таркибига мастер-режа тушунчаси ҳам киритилмоқда.
Сенаторларнинг фикрича, қонун қурилиш соҳасидаги давлат назорати ва бошқарувини янада такомиллаштиради. Қурилаётган бинолар ва иншоотларнинг зилзилабардошлиги ва сейсмик хавфсизлигини таъминлашга асос яратилади.
Қонун тегишли субъектларнинг бу борадаги ваколатларини аниқлаштириш билан бир қаторда шаҳарсозлик тўғрисидаги қонунчиликни такомиллаштиришга ҳам хизмат қилади.
Н.Абдураимова, ЎзА
