Қорақалпоғистонлик болажонга Президент совғаси ва миннатдорлик мактуби топширилди
Давлатимиз раҳбарининг Қорақалпоғистонга ташрифи чоғида ижтимоий тармоқларда Муҳаммад Алий исмли болакайнинг самимий, пок қалби ва Ватанга бўлган меҳри билан Президентимиз билан учрашишга бўлган нияти, билдирган фикрлари кўпчиликнинг меҳри ва эътиборини тортган эди.
Бугун Муҳаммад Алийга Президентимиз унинг болаларча пок қалби билан йўллаган видеомурожаатини кўрганини ва бундан жуда мамнун бўлганини айтиб, “Сен ҳам улғайганингда аждодларимизга муносиб, эл-юртига фойдаси тегадиган инсон бўлишингни истайман” деган илиқ сўзлар билан миннатдорчилик хати етиб келди.
Қорақалпоғистон Республикаси Жўқорғи Кенгесида давлатимиз раҳбарининг миннатдорчилик хати ва совғалари тантанали равишда топширилди. Унда Жўқорғи Кенгес раиси Аманбай Оринбаев Президентимизнинг самимий ёзилган миннатдорчилигини ўқиб эшиттирди.
Шунингдек, Муҳаммад Алийга ҳамда унинг ота-онаси, тарбия олаётган мактабгача таълим ташкилотига Президент совғалари топширилди. Бундан ташқари, болакайнинг тарбиячиси Гулбаҳор Сапаровага Жўқорғи Кенгес Президиуми қарори билан “Ватан фидойиси” кўкрак нишони билан тақдирланди.
Довуд Абибуллаев,
ЎзА мухбири
