Қорақалпоғистонда олтин ишлаб чиқариш корхонаси иш бошлади
Қорақалпоғистон Республикаси Қораўзак тумани ҳудудида Хитойнинг “Ji An Tai International Industries” компаниясининг бойитиш фабрикаси ишга туширилди.
Янги корхонанинг очилиш маросимида Қорақалпоғистон Республикаси Жўқорғи Кенгеси раиси Аманбай Оринбаев сўзга чиқиб, йиғилганларни юртимиз иқтисодиётини ривожлантиришга салмоқли ҳисса қўшадиган янги қувватнинг ишга туширилиши билан қутлади.
Таъкидланганидек, давлатимиз раҳбарининг Қорақалпоғистонга бўлган алоҳида эътибори натижасида минтақанинг инвестицион жозибадорлигини ошириш ва тадбиркорлар учун имкониятлар яратиш борасида кенг кўламли чора-тадбирлар амалга оширилмоқда.
Таъкидлаш жоизки, “Ji An Tai International Industries” компанияси томонидан умумий 33 миллион АҚШ доллари маблағи ҳисобидан ишга туширилган янги заводда соф олтин ишлаб чиқариш жараёни тўртта 9 та пробага (Аu 999,9) етказилгани тарихий воқеалардан бири бўлди, десак муболаға бўлмайди. Ушбу объект тўлиқ қувватда ишга тушгач, суткасига 1000 тонна рудани қайта ишлаш орқали йилига ярим тоннадан зиёд олтин ишлаб чиқариш йўлга қўйилади ва 250 та янги иш ўрни яратилади.
Албатта, Оролбўйи ҳудудида ишга туширилган янги корхона аҳолининг фаровон ҳаётини таъминлашга хизмат қилиши билан бирга, мамлакатимиз иқтисодиётини янада мустаҳкамлашда алоҳида ўрин тутади.
Довуд Абибуллаев,
ЎзА мухбири
