Президент қаржылық айыппұлдарды қолдану тәртібін одан әрі жеңілдетуді тапсырды
Президент Шавкат Мирзиёев 13 сәуір күні кәсіпкерлік субъектілеріне қатысты қаржылық айыппұлдарды қолдану тәртібін одан әрі жеңілдету, бұл бағыттағы артық бюрократиялық кедергілерді қысқарту және мемлекеттік органдар мен лауазымды тұлғалар қызметіне сот бақылауының тиімділігін арттыруға бағытталған ұсыныстардың тұсаукесерімен танысты.
Таныстырылымда қазіргі уақытта қаржылық айыппұлдарды қолдану тәжірибесінде кәсіпкерлер үшін бірқатар мәселелер сақталып отырғаны атап өтілді. Атап айтқанда, айыппұлдардың басым бөлігі өкілетті органдар тарапынан, ал қалғаны соттар арқылы салынуда, бұл сот бақылауын күшейту қажеттігін көрсетеді.
Осыған байланысты биыл 1 қазаннан бастап қаржылық айыппұлдарды ерікті түрде төлеуді ынталандыратын жаңа бірыңғай тәртіпті енгізу ұсынылды. Оған сәйкес, кәсіпкерлік субъектісі өкілетті органның қаулысы табысталған күннен бастап бір ай ішінде айыппұлдың 50 пайызын төлесе, қалған бөлігін төлеуден босатылады.
Сондай-ақ, айыппұлды алты ай ішінде тең үлестермен бөліп төлеу мүмкіндігін енгізу көзделіп отыр. Бұл ретте қаулы табысталғаннан кейін бір ай ішінде айыппұл сомасының алтыдан бір бөлігі төленсе, аталған тәртіп автоматты түрде қолданылады.
Сот бақылауын күшейту мақсатында өкілетті органның қаржылық айыппұл салу туралы қаулысы сот тарапынан жойылған немесе жарамсыз деп танылған жағдайда өндірілген қаражатты 15 күн ішінде қайтару тетігін белгілеу ұсынылды. Егер бұл мерзім бұзылса, кешіктірілген әрбір күн үшін Орталық банктің негізгі мөлшерлемесіне сәйкес өсімпұл есептеу қарастырылған.
Қаржылық айыппұлдарды қолдану үдерістерін цифрландыруға да ерекше назар аударылды. Бизнес-омбудсман жүргізетін «Бірыңғай мемлекеттік бақылау» ақпараттық жүйесінде кәсіпкерлік субъектілеріне салынған қаржылық айыппұлдардың электрондық тізілімін енгізу ұсынылды.
Өкілетті органдардың қаулысы қабылданғаннан кейін электрондық цифрлық қолтаңба арқылы осы жүйеге енгізілуі міндетті болады. Ақпараттық жүйеге енгізілмеген және электрондық қолтаңбамен расталмаған қаулылар жарамсыз деп есептеліп, олардың негізінде айыппұл өндірілмейді.
Сонымен қатар, мобильді қосымша арқылы қаржылық айыппұлдарды есепке алу, оларды мониторингтеу және онлайн төлеу мүмкіндігін жасау, сондай-ақ мүдделі ведомстволардың ақпараттық жүйелерін өзара интеграциялау қажеттігі айтылды. Салық төлеуші – кәсіпкерлік субъектісінің жеке кабинеті арқылы айыппұл туралы шешімдерге онлайн шағым беру және шағым берілген сәттен бастап шешімнің орындалуын автоматты түрде тоқтата тұру мүмкіндігін енгізу жоспарлануда.
Таныстырылымда құқықтық ықпал ету шараларын қолдану тәртібін біріздендіруге бағытталған «Құқықтық ықпал ету шаралары туралы» заң жобасын әзірлеу ұсынылды.
Мемлекет басшысы кәсіпкерлік субъектілерінің құқықтары мен заңды мүдделерін сенімді қорғау, оларды заң талаптарын сақтай отырып жұмыс істеуге ынталандыру, сондай-ақ айыппұл салу тәжірибесінде әділдік пен ашықтықты қамтамасыз ету аса маңызды міндеттердің бірі екенін атап өтті.
Ұсыныстарды жан-жақты пысықтап, сот бақылауын күшейту, цифрландыруды жеделдету және салада бірыңғай, нақты әрі әділ құқықтық тетікті қалыптастыру бойынша жауапты тұлғаларға тиісті тапсырмалар берілді.
