Президент фармони ижроси назоратда
Ўзбекистон Республикаси Президентининг 2024 йил 26 августдаги “Фуқаролик жамияти институтларини давлат томонидан қўллаб-қувватлаш тизимини янада такомиллаштириш чора-тадбирлари тўғрисида”ги фармони ижроси изчил таъминланаётгани ҳудудлардаги амалий ишлар мисолида яққол намоён бўлмоқда.
Хусусан, мазкур ҳужжат ижроси доирасида Олий Мажлис ҳузуридаги Парламент комиссияси аъзолари томонидан Жиззах вилоятининг бир қатор туманларида ижтимоий аҳамиятга эга масалалар чуқур ва комплекс тарзда ўрганилди. Ушбу жараёнга ҳудудий жамоат фондлари вакиллари ҳам кенг жалб этилгани эътиборга молик.
Ўрганишлар давомида жойларда йиллар давомида ечимини кутаётган тизимли муаммолар, аҳолини бевосита қийнаётган долзарб масалалар ҳамда давлат органлари томонидан шакллантирилаётган ижтимоий буюртмалар атрофлича таҳлил қилинди. Энг муҳими, ушбу таҳлиллар қоғозда қолиб кетмади — улар асосида аниқ, манзилли ва ижтимоий аҳамияти юқори бўлган лойиҳалар шакллантирилди.
Таъкидлаш жоиз, ўрганишларнинг бош мезони — ҳудудлардаги реал эҳтиёжлардан келиб чиқиш, муаммоларни жойида аниқлаш ва уларга амалий ечим таклиф қилишдан иборат бўлди. Шу асосда саралаб олинган лойиҳалар келгусида давлат грантлари орқали қўллаб-қувватланиши белгилангани, тизимли ёндашувнинг мантиқий давоми сифатида баҳоланмоқда.
Айниқса, фуқаролик жамияти институтлари, нодавлат нотижорат ташкилотлари ва бошқа жамоат тузилмаларининг салоҳиятидан самарали фойдаланиш, уларни ижтимоий муаммоларни ҳал этиш жараёнига кенг жалб қилиш масаласига алоҳида урғу берилди. Бу эса давлат ва жамият ўртасидаги ҳамкорликни янги босқичга олиб чиқишга хизмат қилади.
Ўрганишлар якунига кўра, 2026 йил учун давлат грантлари танловини эълон қилиш, унинг доирасида энг долзарб ва амалий натижа берувчи ташаббусларни қўллаб-қувватлаш юзасидан аниқ вазифалар белгилаб олинди. Бундай ёндашув, ўз навбатида, давлат маблағларидан мақсадли ва самарали фойдаланиш, очиқлик ва шаффофликни таъминлаш, жамоатчилик назоратини кучайтиришга мустаҳкам замин яратади.
Қисқача айтганда, Президент фармони ижроси доирасида амалга оширилаётган бундай ўрганишлар фақат таҳлил билан чекланиб қолмай, балки ҳудудлардаги муаммоларни ҳал этишга қаратилган аниқ амалий механизмларни шакллантираётгани билан аҳамиятлидир.
Абдужалол Қаюмов, ЎзА мухбири
