O‘zbekiston va Gambiya: turizm sohasida yangi hamkorlik ufqlari ochilmoqda
Mamlakatimiz so‘nggi yillarda xalqaro turizm bozorida o‘z o‘rnini mustahkamlash, yangi turistik yo‘nalishlarni rivojlantirish hamda dunyoning turli mintaqalari bilan hamkorlik geografiyasini kengaytirishga alohida e’tibor qaratmoqda.
Bu jarayonda Afrika qit’asi davlatlari bilan ham aloqalar tobora faollashib bormoqda.
Ana shunday hamkorlikning yana bir muhim qadami sifatida O‘zbekiston va Gambiya o‘rtasida turizm sohasidagi istiqbolli yo‘nalishlar muhokama qilindi.
Turizm qo‘mitasi raisi o‘rinbosari S.Bobokalonov hamda Gambiya Respublikasining O‘zbekistondagi Favqulodda va muxtor elchisi Alkali Fanka Konteks o‘rtasida bo‘lib o‘tgan uchrashuvda ikki mamlakat o‘rtasida turizm sohasidagi hamkorlikni rivojlantirish, sayyohlar almashinuvini kengaytirish va qo‘shma loyihalarni amalga oshirish masalalari muhokama qilindi.
Bugungi kunda turizm sohasi davlatlar o‘rtasidagi iqtisodiy va madaniy munosabatlarni mustahkamlovchi muhim vositalardan biri hisoblanadi. Shu nuqtai nazardan, O‘zbekiston va Gambiya o‘rtasidagi hamkorlik nafaqat turistik almashinuvni ko‘paytirish, balki xalqlar o‘rtasidagi o‘zaro anglashuv va do‘stona munosabatlarni mustahkamlashga ham xizmat qiladi.
Uchrashuvda O‘zbekistonning boy tarixiy-madaniy merosi va zamonaviy turistik imkoniyatlarini Gambiya bozorida keng targ‘ib qilish masalasiga alohida e’tibor qaratildi. Buning uchun qo‘shma marketing tashabbuslarini amalga oshirish, «roud-shou» taqdimotlarini tashkil etish, xalqaro turizm ko‘rgazmalarida birgalikda ishtirok etish hamda yangi turistik mahsulotlarni ishlab chiqish bo‘yicha takliflar ko‘rib chiqildi.
Bunday yondashuv har ikki mamlakat turizm bozori uchun yangi imkoniyatlarni yaratadi. Ayniqsa, marketing hamkorligi orqali O‘zbekistonning Samarqand, Buxoro, Xiva kabi dunyoga mashhur tarixiy shaharlari, ziyorat turizmi, ekoturizm va gastronomik turizm salohiyatini Afrika mintaqasida kengroq tanitish mumkin bo‘ladi.
Shu bilan birga, Gambiya ham Atlantika okeani sohillari, milliy bog‘lari va o‘ziga xos madaniyati bilan o‘zbekistonlik sayyohlar uchun yangi turistik yo‘nalish sifatida qiziqish uyg‘otishi mumkin. Bu esa ikki tomonlama turistik almashinuvni yanada faollashtirishga xizmat qiladi.
Xalqaro amaliyot shuni ko‘rsatadiki, turizm sohasidagi hamkorlik faqat sayyohlar oqimini oshirish bilan cheklanmaydi. U transport, mehmonxona biznesi, xizmatlar sohasi, hunarmandchilik, milliy mahsulotlar eksporti va investitsiyaviy loyihalar rivojiga ham ijobiy ta’sir ko‘rsatadi. Shu bois O‘zbekistonning yangi bozorlar bilan hamkorlikni kengaytirish siyosati iqtisodiy nuqtai nazardan ham muhim ahamiyat kasb etadi.
Uchrashuv yakunida tomonlar turizm sohasidagi hamkorlikni izchil rivojlantirish, o‘zaro manfaatli loyihalarni amalga oshirish hamda uzoq muddatli strategik sheriklikni mustahkamlashga tayyor ekanliklarini bildirdi.
Umuman olganda, O‘zbekiston va Gambiya o‘rtasida turizm sohasida yo‘lga qo‘yilayotgan hamkorlik ikki mamlakat uchun yangi imkoniyatlarni ochishi, turistik almashinuvni kengaytirishi hamda xalqaro maydonda o‘zaro hamkorlikning yana bir samarali yo‘nalishiga aylanishi kutilmoqda.
Muhayyo Toshqorayeva, O‘zA
