Мемлекет басшысы Әндіжан ауданындағы техникумның жұмысымен танысты
Президент Шавкат Мирзиёев Әндіжан ауданындағы «Жібек жолы» индустриялық аймағында орналасқан техникумның жұмысымен танысты.
Елімізде жаңа өнеркәсіп кәсіпорындарын іске қосумен қатар, олар үшін білікті мамандар даярлауға да басымдық беріліп отыр. Бұл ретте білім беру үдерісін өндіріс орындарымен тығыз байланыстыру маңызды рөл атқарады.
«Әндіжан–Хуаня» халықаралық техникумы осы мақсатта құрылды. Техникум «Жібек жолы» аймағындағы тоқыма, машина жасау, электр техникасы және басқа да жоғары технологиялы кәсіпорындарға қажетті, еңбек нарығында сұранысқа ие мамандықтар бойынша кадрлар даярлайды.
Жобаның жалпы құны 15 миллион долларды құрайды және ол толығымен шетелдік инвестициялар есебінен жүзеге асырылды. Нәтижесінде 150 жаңа жұмыс орны ашылды.
Төрт гектар аумақта 5 мың оқушыға арналған заманауи оқу ғимараты салынды. Келесі кезеңде жатақхана, зертхана ғимараты, спорт алаңы, асхана және жасыл аумақтар құрылатын болады.
Мекемеде дуалды білім беру жүйесі енгізілген. Оқушылар теориялық білімді техникумда меңгеріп, тәжірибеден индустриялық аймақтағы ірі кәсіпорындарда өтеді. Осылайша олар оқу кезінде-ақ өндірістік үдерістермен, заманауи құрал-жабдықтармен және технологиялармен жақын танысады.
Техникум биыл маусым айында іске қосылды. Қазір мұнда 210 оқушы білім алуда. 2030 жылға дейін жыл сайынғы қабылдау санын 1 мың 800 адамға, ал оқушылардың жалпы санын 4 мыңға жеткізу жоспарланған. Сонымен қатар білім беру бағыттарының саны 20-ға дейін артатын болады.
Мемлекет басшысы техникумда жасалған жағдайлармен танысып, жастармен және инвестормен әңгімелесті.
