Крикет: “Мустақиллик кубоги” “ANFA” жамоасига насиб этди
Ёзги Олимпия ўйинлари дастуридан ўрин олган крикет спорт турини мамлакатимизда ривожлантириш, унинг моддий-техник базасини мустаҳкамлаш, ёшлар ўртасида оммавийлигини ошириш ҳамда иқтидорли спортчиларни аниқлаш борасида изчил ишлар амалга ошириб келинмоқда.
Ана шундай саъй-ҳаракатлар самараси ўлароқ, куни кеча Тошкент вилоятининг Қибрай туманидаги халқаро крикет стадионида истиқлол айёмининг 35 йиллигига бағишланган “Мустақиллик кубоги” турнири ташкил этилди.
Мамлакатимизнинг турли ҳудудларидан келган жамоалар ўртасидаги муросасиз беллашувлар натижасида мамлакат кубогининг ҳал қилувчи баҳсида Тошкент шаҳрининг “ANFA” ҳамда “O‘zbekiston Stars” жамоалари рўбарў келди.
Крикет спорт турининг ўзига хос шиддатини намойиш этган финал ўйинида “ANFA” жамоаси ғолибликка эришиб, “Мустақиллик кубоги”ни қўлга киритди.
Ғолиб ва совриндорларни тақдирлаш маросимида иштирок этган Ўзбекистон Крикет федерацияси раиси Азиз Михлиев “Мустақиллик кубоги” нафақат клублар ўртасидаги рақобатни кучайтириш, балки ёш ва иқтидорли крикетчиларни қўллаб-қувватлаш, уларнинг спорт маҳоратини оширишга хизмат қилиши билан аҳамиятли эканини таъкидлади.
Т.Рўзиев, ЎзА
