Коррупцияга оид жиноятлар учун жазо чоралари кучайтирилмоқда
Айрим қонун ҳужжатларига коррупцияга оид жиноятлар учун жавобгарлик ва жазо чораларини кучайтиришга оид қўшимча ва ўзгартиришлар киритилмоқда.
Коррупцияга қарши курашиш бўйича миллий ва ҳудудий кенгашлар, Коррупцияга қарши курашиш агентлиги, комплаенс ва коррупцияга қарши ички назорат тузилмалари фаолиятининг самарадорлигини янада ошириш, коррупцияга оид жиноятларнинг аниқ рўйхатини белгилаш, давлат харидларини амалга оширишда коррупциявий омилларни камайтириш шулар жумласидан.
Бу “Ўзбекистон Республикасининг айрим қонун ҳужжатларига коррупцияга қарши курашиш самарадорлигини оширишга, коррупцияга оид жиноятлар учун жавобгарлик муқаррарлигини таъминлашга қаратилган қўшимча ва ўзгартиришлар киритиш тўғрисида”ги қонунда назарда тутилмоқда.
Сенатнинг Суд-ҳуқуқ масалалари ва коррупцияга қарши курашиш қўмитаси мажлисида мазкур қонун дастлабки тарзда муҳокама қилинди.
Жиноят кодексида “коррупцияга оид жиноятлар” деган янги атама ва уларнинг аниқ рўйхати белгилаб қўйилмоқда. Бундан ташқари, пора олиш, пора бериш ва бу жараёнда воситачилик қилганлик учун ҳукм қилинган шахсларга нисбатан жазодан муддатидан илгари шартли равишда озод қилиш институтининг қўлланилиши тақиқланмоқда.
Вояга етмаганлар иштирокидаги маъмурий ҳуқуқбузарликлар тўғрисидаги ишларни кўришда педагогнинг ёки психологнинг иштирок этишига доир талаблар, махсус ҳуқуқдан маҳрум қилиш муддатини қисқартириш ҳақида илтимоснома киритишнинг янги тартиби назарда тутилмоқда.
“Ўзбекистон Республикасининг айрим қонун ҳужжатларига қўшимча ва ўзгартиришлар киритиш тўғрисида”ги қонун ҳам муҳокама қилинди. Қонун билан халқ депутатлари кенгашларининг “Маҳаллий давлат ҳокимияти тўғрисида”ги қонунда назарда тутилганидан бошқа ваколатлари Конституция ва қонунлар билан белгиланиши, Қорақалпоғистон Республикаси Жўқорғи Кенгесининг раиси, халқ депутатлари вилоятлар ва Тошкент шаҳар кенгашининг раислари Коррупцияга қарши курашиш бўйича ҳудудий кенгашларга раислик қилиши мустаҳкамланмоқда.
Айрим қонун ҳужжатларига Омбудсманнинг қонуний фаолиятига тўсқинлик қилганлик учун жавобгарликни такомиллаштириш, Болалар омбудсманининг парламент билан боғлиқ фаолиятини тартибга солиш, унинг вояга етмаганлар жиноятлари ҳақидаги ишларни юритиш, суд ҳамда жиноий жазоларни ижро этиш жараёнларидаги ролини оширишга доир қўшимча ва ўзгартиришлар киритилмоқда.
Муҳокама якунида тегишли қарорлар қабул қилинди.
Н.Абдураимова, ЎзА
