Кўчмас мулкни техник инвентаризациядан ўтказиш тартиби белгиланди

Адлия вазирлиги Кўчмас мулкни техник инвентаризациядан ўтказиш тартиби тўғрисидаги идоравий ҳужжатни давлат рўйхатидан ўтказди.

Мазкур ҳужжатга кўра, техник инвентаризация кўчмас мулкнинг майдони, таркиби, техник тавсифлари ва амалдаги ҳолатини аниқлаш ҳамда унинг кадастр йиғмажилдини шакллантириш мақсадида амалга оширилади.

Техник инвентаризация Давлат кадастрлари палатаси муҳандислари ёки малака шаҳодатномасига эга кадастр муҳандислари томонидан ўтказилади. 

Техник инвентаризация бирламчи ва қайта инвентаризация шаклида ўтказилади. Дастлабки камерал ишлар, дала ишлари ва дала ишларидан кейинги камерал ишлар босқичларида амалга оширилади. Дала ишлари давомида жойига чиққан ҳолда кўчмас мулкнинг ўлчамлари олинади. Конструктив элементлари ҳамда муҳандислик-коммуникация тармоқлари ўрганилади. Техник инвентаризация натижалари асосида кўчмас мулкнинг умумий майдони, фойдали майдони, ҳажми ҳамда бошқа техник кўрсаткичлари аниқланади.

Кўчмас мулкнинг режалари 1:50, 1:100, 1:150 ёки 1:200 масштабларда электрон шаклда тайёрланади. Техник инвентаризация натижаларидан норози бўлган шахслар Кадастр агентлигига ёки судга мурожаат қилиш ҳуқуқига эга. 

Ушбу тартиб кўчмас мулкка оид маълумотларнинг аниқлигини таъминлашга хизмат қилади.

Н.Абдураимова,

ЎзА