Жиззахлик параспортчи Осиё ўйинларига йўлланма олди
Тайланд пойтахти Бангкок шаҳрида парапауэрлифтинг бўйича ўтказилаётган Осиё ва Океания чемпионатида юртимиз шарафини муносиб ҳимоя қилаётган жиззахлик спортчи Рўза Қўзиева яна бир муҳим ютуққа эришди.
Мусобақанинг қизғин ва муросасиз кечган баҳсларида у ўз вазн тоифасида бронза медалини қўлга киритиб, халқаро майдондаги барқарор натижаларини яна бир бор тасдиқлади. Эътиборлиси, ушбу натижа орқали спортчимиз келгуси Осиё ўйинларида иштирок этиш ҳуқуқини қўлга киритди.
Маълумки, Рўза Қўзиева “Париж–2024” Паралимпия ўйинларида кумуш медалга сазовор бўлиб, мамлакатимиз параспорти тарихида муносиб ўрин эгаллаган эди. Унинг бугунги ютуғи юксак маҳорат, мустаҳкам ирода ва изчил тайёргарлик самараси эканини яна бир бор намоён этди.
Мутахассислар таъкидлашича, бундай нуфузли мусобақаларда қўлга киритилаётган ҳар бир натижа спортчиларнинг халқаро рейтингдаги ўрнини мустаҳкамлаш билан бирга, уларнинг йирик комплекс мусобақаларга сараланишида ҳал қилувчи аҳамият касб этади.
Қайд этиш жоиз, мазкур муваффақият ортида вилоят спорт мактаблари, тажрибали мураббийлар ва мутахассисларнинг кўп йиллик самарали меҳнати мужассам. Бугун жиззахлик спортчиларнинг халқаро ареналардаги иштироки ва ютуқлари изчиллик касб этиб, янги авлод спортчилари учун ҳам кучли рағбат бўлмоқда.
Абдужалол Қаюмов, ЎзА мухбири
