Жиззахда мебель саноати ўсмоқда
2026 йилнинг дастлабки икки ойи якунларига кўра, Жиззах вилоятида йирик саноат корхоналари томонидан 16,1 миллиард сўмлик мебель маҳсулотлари ишлаб чиқарилди. Бу ҳақда Ўзбекистон Республикаси Миллий статистика қўмитаси маълум қилди.
Мазкур кўрсаткич ҳудудда мебелсозлик тармоғи барқарор ривожланаётганини англатади. Сўнгги йилларда вилоятда кичик саноат зоналари, ихтисослашган ишлаб чиқариш қувватлари ва хусусий корхоналар сони ортиб, тармоқнинг иқтисодиётдаги улуши изчил мустаҳкамланмоқда.
Айниқса, аҳоли ва қурилиш соҳаси эҳтиёжларига мос замонавий мебель маҳсулотларини ишлаб чиқаришга қаратилаётган эътибор натижадорликни таъминламоқда. Бугунги кунда уй-жой қурилиши ҳажмларининг кенгайиши ички бозорда мебель маҳсулотларига бўлган талабни сезиларли даражада оширмоқда. Бу эса ишлаб чиқарувчиларни янги қувватлар ишга тушириш, ассортиментни кенгайтириш ва сифатни оширишга ундамоқда.
Мутахассислар таъкидлашича, тармоқда маҳаллий хомашёдан самарали фойдаланиш ҳамда замонавий технологияларни жорий этиш рақобатбардошликни таъминлашда ҳал қилувчи аҳамият касб этмоқда. Шу билан бирга, бу омиллар маҳсулот таннархини пасайтириш ва ички бозорни импорт ўрнини босувчи маҳсулотлар билан таъминлаш имконини бермоқда.
Бугунги шароитда мебель саноати нафақат ишлаб чиқариш ҳажмлари ўсиши, балки янги иш ўринлари яратиш, тадбиркорликни қўллаб-қувватлаш ва ҳудудий иқтисодиётни диверсификация қилишда ҳам муҳим драйверга айланмоқда. Жиззах вилоятида бу йўналишда олиб борилаётган ишлар эса тармоқнинг келгуси ўсиши учун мустаҳкам замин яратади.
Абдужалол Қаюмов, ЎзА мухбири
