Имтиёзли кредит орзуларга қанот бўлади
Қишлоқ хўжалиги ва чорвачиликни ривожлантириш, аҳолининг даромад манбаларини кўпайтириш ҳамда озиқ-овқат хавфсизлигини мустаҳкамлаш бугунги кунда давлат сиёсатидаги энг устувор йўналишлардан бирига айланган.
Айниқса, Президентимиз ташаббуси билан тадбиркорликни қўллаб-қувватлаш, аҳолига имтиёзли кредитлар ажратиш, наслчилик чорвачилигини ривожлантириш ва қишлоқларда янги иш ўринлари яратишга қаратилган кенг қамровли ислоҳотлар ўзининг амалий самарасини бермоқда. Бу саъй-ҳаракатлар юртимизнинг чекка ҳудудларида ҳам меҳнаткаш инсонларнинг орзу-мақсадларини рўёбга чиқариб, уларнинг турмуш фаровонлигини юксалтиришга хизмат қилмоқда.
Ана шундай ташаббускор ва меҳнатсевар инсонлардан бири Бухоро вилояти Қоракўл туманининг Тинчлик маҳалласида истиқомат қилувчи Ёғмир Саидовдир.
У давлат томонидан ажратилган имтиёзли банк кредити маблағларидан оқилона ва самарали фойдаланиб, наслдор қўйчилик йўналишида ўз фаолиятини изчил ривожлантирмоқда. Бугунги кунда унинг оғилхонасида 30 дан ортиқ наслдор қўй парваришланмоқда. Улар орасида юқори маҳсулдорлиги, тез ўсиши, вазнни қисқа муддатда тўплаши ҳамда насл сифати билан ажралиб турадиган “Баят”, “Ҳисори”, “Арашан” ва “Линколн” зотли қўйлар алоҳида ўрин тутади.
Бу зотлар гўштдорлиги, сермаҳсуллиги ва иқлим шароитига мослашувчанлиги билан чорвадорлар орасида юқори баҳоланади. Шу боис Ёғмир Саидов нафақат ўз хўжалигини кенгайтириш, балки ҳудудда наслчилик ишларини ривожлантиришга ҳам муносиб ҳисса қўшмоқда.
Унинг энг асосий мақсади – наслдор қўйлар бош сонини янада кўпайтириш, юқори сифатли насл етиштириш ва келгусида бошқа чорвадорларни ҳам сара наслдор қўйлар билан таъминлашдир. Бу эса бир томондан ички бозорни сифатли маҳсулот билан таъминласа, иккинчи томондан ҳудудда чорвачилик маданияти ва маҳсулдорлигининг ошишига хизмат қилади.
Бугун мамлакатимизда Президентимиз раҳбарлигида чорвачилик соҳасини янги босқичга олиб чиқиш бўйича амалга оширилаётган кенг кўламли ислоҳотлар айнан ана шундай меҳнаткаш инсонларни қўллаб-қувватлашга қаратилган. Имтиёзли кредитлар, субсидиялар, наслчиликни ривожлантириш дастурлари, замонавий ветеринария хизматлари ва озуқа базасини мустаҳкамлаш чоралари соҳанинг жадал тараққий этишига мустаҳкам замин яратмоқда. Энг муҳими, “инсон қадри учун” тамойили асосида ҳар бир ташаббускор фуқаронинг меҳнати эътироф этилиб, унинг бизнесини кенгайтириши учун барча шарт-шароитлар яратилмоқда.
Қоракўл туманида Ёғмир Саидов каби ташаббускор чорвадорларнинг сони йил сайин ортиб бораётгани ҳам давлатимиз томонидан олиб борилаётган оқилона сиёсатнинг амалий натижасидир. Бундай меҳнаткаш инсонлар нафақат ўз оиласи фаровонлигини таъминламоқда, балки маҳаллада янги иш ўринлари яратиш, аҳолини сифатли чорва маҳсулотлари билан таъминлаш ва мамлакатимиз озиқ-овқат хавфсизлигини мустаҳкамлашга муносиб ҳисса қўшмоқда.
Бир вақтлар оддий ғоя бўлиб кўринган ташаббус бугун меҳнат, ишонч ва давлат қўллови туфайли муваффақиятли чорвачилик хўжалигига айланмоқда. Ёғмир Саидовнинг ҳаёт йўли шуни яна бир бор исботлайдики, имкониятлардан унумли фойдаланган, меҳнатдан қочмаган инсон албатта ўз мақсадига етади. Бу каби ибратли тажрибалар юртимиз қишлоқларида тадбиркорлик руҳини кучайтириб, Янги Ўзбекистон тараққиётига муносиб ҳисса қўшаётган фидойи инсонларнинг сафини янада кенгайтиради.
Зариф Комилов, ЎзА мухбири
