Халқ дардига қулоқ тутилган юртда ислоҳотлар бардавом бўлади
Сўнгги йилларда юртимизда рўй берган улкан ўзгаришлар Янги Ўзбекистон ғоясини амалий воқеликка айлантирмоқда.
Мамлакат тараққиётининг бош ғоясига айланган инсон қадрини улуғлаш тамойили энди шунчаки даъват эмас — у давлат сиёсати ва жамият ҳаётининг бош йўналишига айланди. Зеро, инсон қадри улуғланган жойда адолат қарор топади, адолат устувор бўлган жамиятда эса тараққиётнинг илдизлари мустаҳкам бўлади.
Ўзбекистон Республикаси Президентининг 2025 йил 26 декабрь куни Олий Мажлис ва халқимизга йўллаган Мурожаатномасида илгари сурилган фикрлар бугунги ислоҳотлар руҳини янада ойдинлаштирди. Унда таъкидланганидек, олдимизга қўйилган юксак мақсадларга фақат халқ билан елкама-елка туриб, унинг дарду ташвишларини ўз қалбимиздан ўтказиб ҳаракат қилгандагина эришиш мумкин. Чунки тажрибали маҳалла фаоллари, нуронийлар, ғайратли ёшлар, ташаббускор тадбиркорлар ва фидойи зиёлилар бирлашган жойда тараққиёт шунчаки режа эмас, балки ҳаёт қонуниятига айланади.
Ана шу эзгу ғояларнинг амалий ифодаси сифатида илгари сурилган “Халқ билан бирга” умуммиллий дастури бугун жамият ва давлат ўртасидаги кўприкни мустаҳкамлаётган муҳим омиллардан бирига айланмоқда. Ушбу дастур доирасида камбағалликка қарши курашиш, ижтимоий ҳимояга муҳтож қатламларни қўллаб-қувватлаш ишларига тадбиркорлик салоҳиятининг жалб этилиши алоҳида аҳамиятга эга. Бу нафақат иқтисодий фаолликни оширади, балки жамиятда ўзаро ишонч, ҳамжиҳатлик ва бирдамлик муҳитини мустаҳкамлайди. Бизнеснинг фақат фойда манбаи эмас, балки ижтимоий масъулият соҳиби сифатида намоён бўлаётгани эса янги тараққиёт маданиятини шакллантираётганини кўрсатади.
Сўнгги йилларда шаклланган мутлақо янги иш услуби — уйма-уй юриш, инсон билан юзма-юз мулоқот қилиш, муаммони жойида ҳал этиш амалиёти ислоҳотларнинг энг ҳаётий ва таъсирчан механизмига айланди. Чунки қоғоз орқали эмас, дил орқали қилинган мулоқот инсон қалбига йўл топади. Юзма-юз суҳбат жараёнида муаммонинг фақат ташқи кўриниши эмас, балки унинг илдизи, оғриғи ва сабаби англашилади. Шу боис бундай мулоқотлар нафақат муаммоларни ҳал қилади, балки одамларда давлат сиёсатига нисбатан ишончни ҳам мустаҳкамлайди.
Амалиёт эса бу фикрларнинг энг ишончли исботидир. Зарбдор туманида истиқомат қилувчи Сафар Шойибековнинг ногиронлик аравачасига бўлган эҳтиёжи қисқа фурсатда ҳал этилгани, боқувчисини йўқотган Ирода Жуманованинг ижтимоий муаммолари жойида бартараф этилгани бу шунчаки факт эмас. Бу инсон тақдирига бефарқ бўлмаслик, унинг дардини ўз дардидек ҳис қилиш маданияти шаклланаётганининг ёрқин ифодасидир.
Шунингдек, йиллар давомида таъмирталаб ҳолда қолиб кетган йўлларнинг қисқа муддатда қайта тикланаётгани ҳам масъулият ва ташаббус бирлашганда қандай натижага эришиш мумкинлигини кўрсатади. Зарбдор туманидаги 7 километрлик автомобиль йўлининг таъмирланиши бу одамларнинг турмуш сифати яхшиланиши, уларнинг кундалик ҳаётига қулайлик кириб келиши демакдир. Бу эса бир ҳақиқатни яна бир бор тасдиқлайди: муаммони ҳал этишнинг биринчи қадами унга бефарқ бўлмасликдир.
Статистик маълумотлар ҳам бу жараёнлар самарасини аниқ рақамларда намоён этмоқда. Хусусан, Жиззах вилоятида 2024 йилда Президентнинг Виртуал ва Халқ қабулхоналарига 53 мингдан ортиқ мурожаат келиб тушган бўлса, 2025 йилда бу кўрсаткич 42 минг 393 тани ташкил этди. Қарийб 20 фоизлик камайиш бу шунчаки рақам эмас. Бу жойларда муаммоларни ҳал этиш тизими тобора самарали ишлаётгани, одамлар ўз муаммосига жойида ечим топа бошлаганининг амалий ифодасидир.
Бироқ эришилган натижалар билан чекланиб қолиш ислоҳотлар руҳига зид. Чунки ҳали-ҳамон айрим жойларда мурожаатларга расмиятчилик билан ёндашиш, “назоратга олинди” ёки “келгуси дастурга киритилди” каби умумий жавоблар билан чекланиш ҳолатлари учраб турибди. Бундай ёндашув ортида инсон дарди соя остида қолиб кетмаслиги керак.
Давлатимиз раҳбари томонидан белгиланаётган устувор вазифалар, жумладан, жисмоний тарбия ва спорт соҳасини янги босқичга олиб чиқиш, аҳолини оммавий спортга кенг жалб этиш каби муҳим йўналишлар ҳам жойларда айнан шу масъулият ва фидойилик билан амалга оширилган тақдирдагина ўз самарасини беради. Зеро, ҳар қандай ислоҳотнинг қадри унинг инсон манфаатига қанчалик хизмат қилаётгани билан ўлчанади.
Энг муҳими, бугун одамлар дунёқарашида туб бурилиш юз бермоқда. Халқимиз ислоҳотлар қуруқ гап эмаслигига, улар ортида ҳақиқий ғамхўрлик ва бунёдкорлик турганига ишона бошлади. Бу ишонч эса ҳар қандай тараққиётнинг ҳаракатлантирувчи кучидир.
Эркин ХОЛМАТОВ,
O‘zLiDeP Жиззах вилоят Кенгаши раиси,
Халқ депутатлари Жиззах вилоят Кенгашидаги
O‘zLiDeP депутатлик гуруҳи раҳбари.
ЎзА
