Финляндия ва Норвегия етакчилари Путинни тинчликка чақирди (+видео)
Финляндия Президенти Александр Стубб ва Норвегия Бош вазири Йонас Гар Стёре сешанба куни Россия Президенти Владимир Путин билан телефон орқали гаплашди. Улар Путинни Украинадаги урушни тугатиш ва барқарор тинчликка эришиш мақсадида музокара бошлашга чақирди. Бу ҳақда “Euronews” ёзган.
– Суҳбат очиқ ва мазмунли кечди, – деган Стубб суҳбат якуни бўйича расмий баёнотида. – Биз Россия билан қўшни мамлакатлармиз. Бу уруш бизга, қолаверса, бутун Европа хавфсизлигига бевосита дахлдор. Жангни тўхтатиш учун бевосита мулоқот зарур.
– Уруш ўта жиддий ҳалокатларга олиб келмоқда, – деди ўз навбатида Стёре. Одамларнинг азоб-уқубати, вайронагарчилик бир неча авлодга таъсир кўрсатади. Мулоқот давомида кескинликни юмшатиш муҳимлигини таъкидладик.
Норвегия ва Финляндия Украинага энг кўп ҳарбий ёрдам кўрсатаётган мамлакатлар қаторига киради. Бинобарин, икки давлат раҳбарлари Путинга бу ёрдам давом этишини ҳам билдирган.
Кремль маълумотига кўра, Путин жавобан “адолатли ва узоқ муддатли тинчликка фақат Россия Федерацияси қонуний манфаати тўлиқ, сўзсиз инобатга олинган тақдирдагина эришиш мумкин”лигини айтган. Шунингдек у Европа Иттифоқи ва НАТО мамлакатларининг қарама-қаршиликка асосланган сиёсати ҳарбий ҳаракат чўзилишига олиб келаётганини ҳам таъкидлаган.
Телефон қўнғироғи ташаббуси Стубб ва Стёредан чиққан. Сўзлашувдан кейин улар Украина Президенти Владимир Зеленский билан ҳам маслаҳатлашган.
Киев етакчиси иттифоқчиларга фаол дипломатик қўллаб-қувватлови учун миннатдорлик билдирган.
Кенжа Бекжонов, Улуғбек Тўхтаев (видео), ЎзА
