Эронлик чорвачилик соҳаси вакиллари мамлакатимиз наслчилик хўжалиги фаолияти билан танишди
Шу кунларда Эрон Ислом Республикасидан юртимизга ташриф буюрган расмий ва бизнес делегацияси вакиллари, чорвачилик, наслчилик ва озиқлантириш соҳаларида фаолият юритувчи Эрон компаниялари раҳбарлари мамлакатимиздаги қишлоқ хўжалиги ва чорвачилик соҳасидаги илғор тажрибалар билан танишмоқда.
Мамлакатимизда чорвачиликни ташкил этиш имкониятлари, наслчилик ишлари, маҳсулдор чорва молларини парваришлаш ва ишлаб чиқариш жараёнлари билан яқиндан танишиш, шунингдек, соҳада тажриба алмашиш ва амалий ҳамкорлик имкониятларини ўрганиш мақсадида ташкил этилган ташриф доирасида чорвачилик йўналишидаги делегация аъзолари Чиноз туманидаги “Юлдуз” наслчилик фермер хўжалигида бўлди.
Меҳмонларга хўжалик раҳбари томонидан фермер хўжалигида амалга оширилаётган ишлар, чорва молларини парваришлаш ва наслчилик йўналишидаги фаолият ҳақида маълумот берилди.
Қайд этилганидек, бугунги кунда хўжаликда 700 бош наслли қорамол парваришланмоқда. Ҳар бир сигирдан бир кунда ўртача 30 литр сут соғиб олинмоқда. Ташриф давомида эронлик мутахассислар хўжаликдаги иш жараёнларини кўздан кечириб, ўзларини қизиқтирган саволларга жавоб олдилар.
Ўзаро тажриба алмашиш ва амалий мулоқотлар Ўзбекистон ва Эрон ўртасида чорвачилик соҳасида ҳамкорликнинг янги йўналишларини белгилашга хизмат қилади.
Г.Бобоева,ЎзА
