Энди 500 АҚШ долларигача нақд валюта харидида паспорт талаб қилинмайди
Ўзбекистонда аҳоли учун нақд чет эл валютасини харид қилиш тартиби янада соддалаштирилмоқда. Янги тартибга кўра, кичик миқдордаги валюта операцияларини амалга оширишда шахсни тасдиқловчи ҳужжатни тақдим этиш талаби енгиллаштирилди. Бу фуқароларга банк хизматларидан тезкор ва қулай фойдаланиш имконини яратади.
Тижорат банкларида жиноий фаолиятдан олинган даромадларни легаллаштиришга, терроризмни молиялаштиришга ҳамда оммавий қирғин қуролини тарқатишни молиялаштиришга қарши курашиш бўйича ички назорат қоидаларига қўшимча ва ўзгартиришлар киритилди.
Марказий банк маьлумотига кўра, 2026 йил 9 августдан бошлаб жисмоний шахслар томонидан нақд чет эл валютасини сотиб олишда шахсни тасдиқловчи ҳужжат талаб этиладиган лимит 100 АҚШ долларидан 500 АҚШ долларигача оширилади.
Янги тартибга мувофиқ, 500 АҚШ доллари эквивалентигача бўлган нақд чет эл валютасини харид қилишда фуқаролардан паспорт ёки шахсни тасдиқловчи бошқа ҳужжат талаб этилмайди. Бу эса аҳолига кичик миқдордаги валюта операцияларини ортиқча расмийлаштиришсиз амалга ошириш имкониятини беради.
Шу билан бирга, мазкур қарор доирасида банк тизимида жиноий даромадларни легаллаштириш, терроризмни молиялаштириш ҳамда оммавий қирғин қуролини тарқатишни молиялаштиришга қарши курашиш соҳасидаги ички назорат механизмларини такомиллаштиришга қаратилган яна бир қатор ўзгартиришлар ҳам назарда тутилган.
Мазкур ўзгартишларнинг барчаси 2026 йил 9 августдан кучга киради.
Экспертлар фикрича, янги тартиб бир томондан аҳоли учун банк хизматларидан фойдаланишни енгиллаштирса, иккинчи томондан халқаро талаблар асосида молиявий хавфсизлик ва шаффофликни таъминлашга хизмат қилади. Шу тариқа банк тизимида мижозларга қулайлик яратиш ҳамда молиявий мониторинг самарадорлигини ошириш ўртасида мувозанат таъминланади.
Ш.Маматуропова, ЎзА
