Чўлланишга қарши Хитой тажрибаси ўрганилмоқда (+видео)
Тошкент шаҳрида Марказий Осиёда чўлланишга қарши курашиш технологиялари бўйича ўқув семинари ташкил этилди. Ушбу ўқув курслари Хитой Фанлар академиясининг Шинжон экология ва география институти билан ҳамкорликда ўтказилмоқда.
Маълумки, чўлланиш — Хитой ва Марказий Осиё давлатлари биргаликда дуч келаётган умумий экологик муаммодир. Мазкур ўқув машғулоти “Хитой тажрибасини баҳам кўриш, минтақавий яшил ҳамкорликни биргаликда ривожлантириш” мавзусига бағишланган. У Хитой - Марказий Осиё чўлланишга қарши курашиш ҳамкорлик маркази ҳамда Ўзбекистон Республикаси Экология, атроф-муҳитни муҳофаза қилиш ва иқлим ўзгариши вазирлиги ҳузуридаги Ўрмон хўжалиги агентлигининг Чўлланишга қарши курашиш бошқармаси томонидан ташкил этилди.
- Бу тадбир ўтган йили Марказий Осиё республикалари раҳбарлари иштирокида ўтган Саммитда қабул қилинган қарорлар, яъни “Чўлланишга қарши курашиш маркази”ни ташкил этиш, умуман Марказий Осиё давлатларида Хитой тажрибаси асосида чора-тадбирларни амалга ошириш бўйича қабул қилинган қарорларни амалга жорий этиш мақсадида ташкил қилинди, - дейди Ўрмон ва яшил ҳудудларни кўпайтириш, чўлланишга қарши курашиш агентлиги директори Эркин Муҳиддинов. – Бугунги тадбирга Марказий Осиё давлатларидан Қозоғистон, Қирғизистон, Тожикистоннинг чўлланиш соҳасига қарши курашиш йўналишида ишлайдиган мутахассислар, ўрмон агентликлари вакиллари келган. Муҳими бу тадбиримиз жуда катта амалий аҳамиятга эга. Чунки, чўлланишга қарши курашнинг илмий ёндашувлари, бу борадаги хорижий технологиялар, уларни жорий этиш йўллари, лойиҳаларни амалга ошириш шакллари ва муваффақиятли кейсларни ўрганиб чиқмоқдамиз.
Семинарда қум кўчиши ва чўлланишга қарши курашиш, шўрланган ерларни мелиорация қилиш, сувни тежайдиган қишлоқ хўжалиги технологиялари ва экологик қайта тиклаш каби йўналишларга алоҳида эътибор қаратилди. Бундан кўзланган мақсад тажриба алмашиш ва технологик ҳамкорлик орқали барча мамлакатларнинг чўлланишга қарши курашиш салоҳиятини ҳар томонлама ўрганиш ҳамда минтақавий экологик амалий ҳамкорликни чуқурлаштиришдир.
Ўқув машғулотларида Хитойнинг чўлланишга қарши курашиш соҳасидаги таниқли олимлари, шунингдек, бир қатор экологик йўналишдаги корхона вакиллари ўз билим ва технологиялари билан ўртоқлашди.
Тадбирда Экология, атроф-муҳитни муҳофаза қилиш ва иқлим ўзгариши вазирлиги ҳузуридаги Ўрмон хўжалиги агентлиги директори Эркин Муҳиддинов, Хитой - Ўрта Осиё чўлланишга қарши курашиш ҳамкорлик маркази вакили Чен Ёнг жаноблари сўзга чиқиб, ушбу мавзунинг инсоният учун қанчалик долзарб эканлиги, чўлланишга қарши курашда барча масъул эканлиги, ўқув курсларида иштирок этганлар жойларда табиатга салбий таъсирни камайтиришда фаол қатнашишлари зарурлиги таъкидланди.
Шу билан бирга Хитой Халқ Республикасининг ўрмончиликни ривожлантириш ҳамда чўлланишга қарши курашиш соҳасида ҳамкорликни янада мустаҳкамлаш бўйича олиб борилаётган ишлари тўғрисида маълумот берилди.
Жумладан, ушбу давлатнинг “Sinoway Forest Technology” компанияси билан ҳамкорликда Боботоғ давлат ўрмон хўжалиги ҳудудида писта ва коврак плантацияларини барпо этишда 5 минг гектарлик майдонда пистазор ташкил қилиш лойиҳаси якунига етказилмоқда.
Хитойнинг илғор технологияси асосида 250 минг дона писта уруғи тўпчалари (seedball) тайёрланди.
“Хитой – Марказий Осиё чўлланишга қарши курашиш бўйича халқаро ҳамкорлик маркази” билан биргаликда Тошкент вилоятидаги Миллий дендрология боғи ҳудудида “Тошкент дендрарийси демонстрация зонаси”ни амалга ошириш режалаштирилмоқда. Дастлабки ҳисоб-китобларга кўра лойиҳа учун Хитой томони 420 минг АҚШ долларига тенг беғараз кўмак маблағларини ажратиши мўлжалланяпти.
Семинар савол-жавоблар руҳида ўтди. Иштирокчилар соҳа мутахассисларидан чўлланишга қарши курашнинг хориж тажрибаси ҳамда самарали усулларини билиб олдилар.
<iframe width="650" height="420" src="https://www.youtube.com/embed/lhi2xjidZM8" title="Cho‘llanishga qarshi Xitoy tajribasi o‘rganilmoqda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Санжар Тошпўлатов,, Искандар Исматов, ЎзА
