Буюмларда дунёни яратган кулол
Икуо Хираяма Халқаро маданият карвон саройида кулол Фания Деденёванинг 70 ёшлик юбилейига бағишланган “Кулолчилик – умрим мазмуни” номли шахсий кўргазмасининг очилиши бўлиб ўтди.
Кўргазмада ижодкорнинг 100 дан ортиқ кулолчилик ишлари намойиш қилинди.
Фания Деденёва ўз ишининг устаси, лойдан ҳар хил ажойиб асарлар яратади. Турли хил ҳажмдаги лаганларга юртимизнинг тарихий обидалари, ажойиб табиати ва архитектурасини чизади. Бу орқали ўзининг ҳаётга бўлган қизиқиши ва иштиёқини баён этади. Шу билан бирга, археологик топилмаларга асосланган ҳолда қадимий идишлар, кўзалар, гулдонларни замонавий нақшларга уйғун ҳолда қайта тиклашга ҳаракат қилади.
Тадбирда қайд этилганидек, Фания Деденёва республика ва халқаро кўргазмалар иштирокчиси. Жумладан, Таллин, Олма – ота, Ленинград, Харков каби шаҳарларда ўтказилган кўргазмаларда ўзининг энг сара ишлари билан қатнашган.
Шунингдек, у ясаган буюмлар ҳозирда АҚШ, Жанубий Корея ва Германияда шахсий тўпламларда сақланиб келади. 2021 йил ўтказилган “Тасвирий ва амалий санъат фестивалида “Энг фаол ижодкор” номинацияси ғолиби бўлган ва диплом билан тақдирланган.
Ижодкор хайрия кўргазмаларида ҳам фаол қатнашади.
Бу йил кулол 70 ёшни қаршилади. Шунга қарамасдан, кулолчилик санъатини ривожлантириш ва ёшларга ўргатиш борасида тинимсиз меҳнат қилиб келмоқда.
Кўргазма жорий йилнинг 12-июлигача давом этади.
Г.Бобоева,ЎзА
