Bir xonadondagi tadbirkorlik faoliyati o‘nlab insonlarning daromad manbaiga aylanmoqda
Bir paytlar oddiy xonadon bo‘lgan manzilda bugun tikuv mashinalarining ovozi yangraydi. Bu yerda mehnat qilayotgan har bir insonning o‘z orzusi, o‘z oilasi, o‘z rizqi bor. Ammo ularni bir maqsad — mehnat qilib, halol daromad topish va oila farovonligini oshirish birlashtirib turibdi.
Buxoro viloyatining G‘ijduvon tumanining Yangiobod mahallasidagi Mangitonobod qishlog‘ida amalga oshirilayotgan ishlar jarayonida tadbirkorlar va aholi bilan muloqotlar ham ana shunday hayotiy misollarga boy bo‘ldi. Bu yerda bir xonadon doirasida yo‘lga qo‘yilgan kichik tadbirkorlik faoliyati nafaqat bir oilaning, balki o‘nlab insonlarning daromad manbaiga aylanmoqda.
Xonadonda yashovchi tadbirkor Jahon Sayfullayev oilaviy tadbirkorlikni rivojlantirish maqsadida 2026-yilda 100 million so‘m imtiyozli kredit oldi. Ushbu mablag‘ ishlab chiqarishni kengaytirish, zarur jihozlarni yo‘lga qo‘yish va tikuvchilik faoliyatini rivojlantirish uchun muhim imkoniyat yaratdi. Bugun esa bu imkoniyat o‘z samarasini bermoqda. Xonadonda erkak va ayollar choponlari tikilmoqda. Hozirda bu yerda 10 nafar ishchi doimiy mehnat qilmoqda. Bir qarashda bu oddiy tikuvchilik ustaxonasidek ko‘rinishi mumkin. Ammo uning ortida katta ma’no bor: kredit — ishlab chiqarishga, ishlab chiqarish — bandlikka, bandlik esa oilaviy daromadga aylanmoqda.
Tashabbusning eng e’tiborli jihatlaridan biri shundaki, tadbirkorlik faqat mazkur xonadonda ishlayotganlar bilan cheklanib qolmagan. Hududdagi 25 nafar ishsiz xotin-qiz kasanachilik asosida ish bilan ta’minlangan. Bu ayollar uchun ish joyiga uzoq masofani bosib o‘tish shart emas. Ular o‘z xonadonlarida mehnat qilib, oilaviy yumushlarini ham bajarish bilan birga daromad topish imkoniyatiga ega bo‘lmoqda. Ularning har biriga o‘rtacha 2,5 million so‘mdan daromad shakllanmoqda. Demak, bir tadbirkorlik tashabbusi ortida 25 ta oilaning iqtisodiy imkoniyati kengaymoqda. Bu esa raqamdan ko‘ra kattaroq ma’noni anglatadi.
Chunki ishsiz ayolning ishli bo‘lishi — bir oilada qo‘shimcha daromad paydo bo‘lishi, farzandlar ehtiyojlarini ta’minlash imkoniyati kengayishi, eng muhimi, insonning o‘z mehnatiga bo‘lgan ishonchi ortishi demakdir. Mehnat samarasi esa tayyor mahsulotlarda namoyon bo‘lmoqda. Xonadonda tayyorlanayotgan erkaklar va ayollar choponlari nafaqat tuman bozorlarida, balki Samarqand va Qashqadaryo viloyatlari, shuningdek, Tojikiston bozoriga ham yetkazib berilmoqda. Bu esa mahalladagi kichik ishlab chiqarishning bozor talabiga moslashib, o‘z xaridorini topayotganidan dalolat beradi. Kecha oddiy xonadonda boshlangan harakat bugun hududlararo savdo aloqalariga ulanmoqda. Tikuv mashinasi ortida o‘tirgan insonning mehnati esa mahalla chegarasidan chiqib, boshqa hududlar va qo‘shni davlat bozorigacha yetib bormoqda.
Davlat rahbari tashabbusi bilan mamlakatimizda aholi bandligini ta’minlash, oilaviy tadbirkorlikni qo‘llab-quvvatlash, ishsiz fuqarolarga o‘z biznesini boshlash uchun imtiyozli moliyaviy imkoniyatlar yaratishga alohida e’tibor qaratilmoqda.
G‘ijduvon tumani Yangiobod mahallasidagi ushbu xonadon misoli ana shu siyosatning odamlar hayotidagi amaliy natijasini ko‘rsatib turibdi. Bu yerda gap faqat 100 million so‘mlik imtiyozli kredit haqida emas. Asosiy natija — shu mablag‘ evaziga yaratilgan ish o‘rinlari, paydo bo‘lgan daromad manbalari va o‘z mehnati bilan oilasini ta’minlayotgan insonlardir.
Zarif Komilov, O‘zA muxbiri
