16 йиллик давр тугади: Венгрияда сиёсий инқилоб
Венгрияда сайлов тарихий натижа билан якунланди. 16 йил давомида ҳокимият тепасида турган Бош вазир Виктор Орбан мағлуб бўлди ва унинг ўрнини Петер Мадьяр эгаллади. Овоз беришда қатнашиш даражаси 77,8 фоизни ташкил этиб, мамлакат тарихидаги энг юқори кўрсаткич қайд этилди. Бу натижа жамиятда жиддий ўзгаришга талаб кучли эканини кўрсатди.
Ғалабадан сўнг Мадьяр ўз сиёсий йўналишини очиқ айтиб, Венгрияни яна Европа Иттифоқи ва НАТО билан яқин ҳамкор давлатга айлантиришини билдирди. Шунингдек, давлат бошқарувида мувозанатни тиклаш, коррупцияга қарши қатъий кураш олиб боришга ваъда берди. Унинг чиқиши тарафдорлари томонидан фаол қўллаб-қувватланди.
Орбан эса мағлубиятни тан олди ва жамиятни бирлашишга чақирди. У келгусида мухолифат сифатида фаолият юритишини билдирди.
Европа етакчилари янги ҳукуматни табриклаб, юз берган ўзгаришни ижобий баҳолади. Айниқса, Брюссель билан муносабат яхшиланиши кутилмоқда.
Эндиги энг муҳим босқич – янги ҳукумат фаолияти. Мадьяр Европа маблағларини қайтариш ва давлат тизимини ислоҳ қилишни режалаштирган. У дастлабки хорижий ташрифлар учун Варшава, Вена ва Брюсселни танлади. Қисқаси, Венгрияда янги сиёсий давр бошланди.
Мусулмон Зиё,
ЎзА
