Якка тартибдаги тадбиркорлар учун лизинг: янги имкониятлар
Парламент қуйи палатаси мажлисида якка тартибдаги тадбиркорларнинг лизинг хизматларидан фойдаланиш имкониятларини кенгайтиришга қаратилган қонун лойиҳаси биринчи ўқишда кўриб чиқилмоқда.
Ушбу ҳужжат билан Фуқаролик кодекси ва «Лизинг тўғрисида»ги қонунга якка тартибдаги тадбиркорларнинг лизинг олиш имкониятларини кенгайтириш, лизинг муносабатларининг ҳуқуқий асосларини такомиллаштиришга қаратилган ўзгартириш ва қўшимчалар киритиш назарда тутилмоқда.
Хусусан, лизинг олувчи тушунчасига аниқлик киритилиб, якка тартибдаги тадбиркор ёки юридик шахс лизинг олувчи сифатида эътироф этилиши белгиланмоқда. Бу орқали якка тартибдаги тадбиркорларнинг лизинг муносабатларидаги ҳуқуқий мақоми аниқ белгиланади.
Лойиҳада лизинг объектини ҳисобга олиш тартибини такомиллаштириш, бунда лизинг объекти лизинг олувчининг балансида ҳисобга олиниши ҳам акс этмоқда. Лизинг олувчи якка тартибдаги тадбиркор бўлган ҳолларда эса лизинг объекти лизинг берувчининг балансида ҳисобга олиниши тадбиркорларда бухгалтерия баланси мавжуд эмаслиги билан боғлиқ ҳолда лизинг хизматларидан фойдаланиш билан боғлиқ чекловни бартараф этишга хизмат қилади.
Натижада якка тартибдаги тадбиркорлар учун лизинг хизматларидан фойдаланишнинг ҳуқуқий механизми яратилади. Қонун лойиҳасида лизинг объектининг ҳуқуқий ва мулкий эгалиги, амортизацияни қўллаш тартиби, шунингдек, лизинг объектидан фойдаланиш шартлари ва чекловлари шартномада мажбурий тартибда кўрсатилиши назарда тутилмоқда. Бу лизинг муносабатларида ҳуқуқий аниқликни таъминлаш ва шартнома шартларини бир хил ёндашув асосида шакллантиришга имкон беради.
Мажлисда қайд этилганидек, ушбу қонун лойиҳасининг қабул қилиниши тадбиркорлик субъектлари учун молиявий ресурслардан фойдаланиш имкониятларини кенгайтириш, молия бозори инфратузилмасини янада ривожлантириш ҳамда тадбиркорликни қўллаб-қувватлашнинг узлуксиз тизимини шакллантиришга хизмат қилади.
Муҳокамалар якунида қонун лойиҳаси депутатлар томонидан биринчи ўқишда қабул қилинди.
ЎзА
