Уиткофф Путин билан музокара ўтказиш учун Россияга келди (+видео)
АҚШ Президентининг махсус вакили Стив Уиткофф Владимир Путин билан музокара олиб бориш учун Санкт-Петербургга келди. Бу ҳақда DW хабар берди.
Мулоқотда Дональд Трампнинг куёви Жаред Кушнер ҳам Америка томони вакили сифатида видео алоқа орқали иштирок этиши кутиляпти.
Бир кун аввал Уиткофф ва Кушнер Ослода Украина Президенти ҳамда Европа мамлакатлари вакиллари билан суҳбатлашиб, Россия – Украина урушини тугатиш йўлларини излаган.
Музокарада Украина учун хавфсизлик кафолати, ҳудудий масала, санкция ва урушдан кейинги Европа хавфсизлиги тизимини шакллантириш масалалари ҳам муҳокама қилинган.
Учрашув якуни бўйича ўтказилган матбуот анжуманида Финляндия Президенти Александр Стубб “сезиларли олға силжиш”га эришилганини таъкидлади.
Норвегия Бош вазири Йонас Гар Стёре мулоқотдан сўнг АҚШ махсус вакили Вашингтон ва Европа ҳамкорлари томонидан тайёрланган таклифни Путинга етказишини маълум қилди. Унинг сўзларига кўра, Уиткофф Россияга бориб, олий даражадаги учрашув ташкил этилишига ҳам кўмаклашиши мумкин.
Маълумотга кўра, Уиткофф РФ етакчисига урушни тугатиш бўйича янгиланган режа тақдим этади. Америка томони бевосита Трамп, Путин ва Зеленский иштирокида учрашув ташкил қилишга эришишни ҳам кўзлаяпти.
Ослодаги матбуот анжуманида Зеленский Украина қатнашмайдиган музокарага қарши эканлигини таъкидлаган.
Кенжа Бекжонов, Анвархўжа Аҳмедов (видео), ЎзА
