Трамп Москвага қарши энг жиддий қонунлардан бирини имзолади (+видео)
АҚШ Конгрессининг Вакиллар палатаси чоршанба куни Россияга қарши кенг қамровли янги санкциялар пакетини маъқуллади, деб хабар берди Euronews.
Бу эса ДональдТрампга Москвага қарши сўнгги йиллардаги энг жиддий қонунлардан бирини имзолаш имконини берди.Украинанинг инсон ҳуқуқларини ва муайян манфаатларни ҳимоя қилувчи ташкилотлари қонуннинг қабул қилинганини олқишлади ва уни зудлик билан амалга оширишга чақирди.
Россия президенти матбуот котиби Дмитрий Песковнинг айтишича, янги санкциялар Россия ва Украина ўртасидаги урушни тугатиш бўйича музокараларни янада қийинлаштиради.
Санкциялар Россиянинг энергетика ва мудофаа соҳаларига, президент Владимир Путин ва унинг яқин атрофидаги шахсларга, шунингдек, Москва Ғарб санкцияларини четлаб ўтиш учун фойдаланаётган нефт ташувчи танкерларга қаратилган.
Жаҳон энергетика бозори учун энг муҳим жиҳат шундаки, бу қонун Трампга Россия нефти ва газини катта миқдорда харид қилишда давом этаётган давлатларга 100 фоизгача бож жорий қилиш ҳуқуқини беради. Бу чора, аввало, Россиянинг ҳали ҳам энг йирик харидорлари бўлиб қолаётган Хитой ва Ҳиндистонга таъсир қилиши мумкин.
Айнан божлар масаласи Вашингтонда Украинани қўллаб-қувватловчилар орасида ҳам баҳсларга сабаб бўлди. Айрим демократлар Россияга босимни кучайтириш тарафдори бўлса-да, президентга савдо сиёсати бўйича бундай кенг ваколат беришга қарши чиқди. Қонун тарафдорлари Россияга босимни янада кучайтириш зарур, деб ҳисоблайди. Уларнинг таъкидлашича, Россиянинг Украинага қарши уруши бешинчи йилга кирмоқда ва ҳозирча ўт очишни тўхтатиш бўйича аниқ истиқбол кўринмаяпти.
Киев ҳам қонунни олқишлади. Украина президенти Володимир Зеленский ҳам Конгрессни санкцияларни тасдиқлашга очиқдан-очиқ чақирган. Унинг фикрича, Москва музокараларга қайтиши учун уни узоқ муддатли иқтисодий босим остида ушлаб туриш керак.
Ҳиндистон эса ўз сиёсатини ўзгартирмаслигини маълум қилди. Санкцияларга қарамасдан мамлакат Россия нефтини харид қилишда давом этишини билдирди. Россия Ҳиндистоннинг муҳим стратегик ва ҳарбий ҳамкорларидан бири бўлиб қолмоқда. Бу эса Вашингтоннинг Москвага иқтисодий босим ўтказиш ва уни халқаро иқтисодий майдондан ажратиш ҳаракатларини мураккаблаштирмоқда.
Қонун Россиянинг ҳарбий ҳаракатларини қўллаб-қувватлаётган компаниялар ва хорижий ташкилотларга ҳам татбиқ этилади. Шунингдек, Эрон билан боғлиқ амалдаги санкциялар муддати узайтирилади.
Кенжа Бекжонов, ЎзА
