Тибетда 7 балли зилзила: қурбонлар бор

Тибетда содир бўлган 7 магнитудали зилзила оқибатида камида 16 киши ҳалок бўлди, 54 киши жароҳатланди. Кучли силкиниш Нагчу шаҳри ва унинг атрофидаги юзлаб уйларни вайрон қилган.

Таъкидланишича, зилзила маҳаллий вақт билан пайшанба куни соат 22:33 да, Нагчудан 191 километр узоқликдаги тоғли ҳудудда содир бўлган. Хитой давлат телеканали бу минтақада сўнгги беш йилда қайд этилган энг кучли зилзила эканини хабар қилди. Шунингдек, табиий офат натижасида камида 339 та уй ва чорва моллари сақланадиган 20 та бино қулаган.

Ҳудудда қутқарув ишларига 1 600 дан ортиқ киши жалб қилинган, жабрланганларга вақтинчалик бошпаналар, кўрпа-тўшаклар ва қишки кийимлар етказилмоқда.

Зилзиладан кейин магнитудаси 4,3 дан 5,2 гача бўлган камида еттита такрорий силкиниш қайд этилган. Кўчкилар сабабли 317 миллий автомобиль йўлининг бир қисми ёпилган, айрим ҳудудларда алоқа узилган ва поездлар ҳаракати вақтинча тўхтатилган. Ҳудудда яқин уч кун ичида қор ёғиши кутилмоқда, бу эса қутқарув ишларини қийинлаштириши мумкин.

Мусулмон Зиё, ЎзА