Табиий ресурслардан оқилона фойдаланишни таъминлайдиган бошқарув шакли ривожлантирилади
Мамлакатимизда яйловларни муҳофаза қилиш, улардан самарали ва оқилона фойдаланишни ташкил этиш ҳамда яйлов хўжалигини ривожлантиришга алоҳида ёндашилмоқда.
Айни йўналишда бошқарувнинг ихчам ва самарали тизимини жорий этиш, чорвачилик хўжаликларининг ер участкаларига бўлган ҳуқуқларини эътироф этиш каби жиҳатлар Президентимизнинг “Яйловларни муҳофаза қилиш ва улардан оқилона фойдаланишнинг замонавий механизмларини жорий этиш чора-тадбирлари тўғрисида”ги қарор билан мустаҳкамланган.
Ветеринария ва чорвачиликни ривожлантириш қўмитаси ҳамда Бирлашган Миллатлар Ташкилоти ҳамкорлигида “2026 йил – Халқаро яйловлар ва чорвадорлар йили” муносабати билан семинар бўлиб ўтди.
Семинарда Бирлашган миллатлар ташкилотининг Халқаро озиқ-овқат ва қишлоқ хўжалиги ташкилоти билан ҳамкорликдаги грант лойиҳалари ва келгусида амалга оширилиши режалаштирилган масалалар муҳокама қилинди.
Таъкидлаш керак, 2026 йилнинг “Халқаро яйловлар ва чорвадорлар йили” деб эълон қилиниши яйловлар ва чорвадорларнинг аҳамияти ҳақида хабардорликни ошириш, чорвачилик соҳасидаги фаол инвестицияларни қўллаб-қувватлаш учун қулай имконият яратди, дейилади Ветеринария ва чорвачиликни ривожлантириш қўмитаси маълумотида.
Бунда, албатта, чорвадорларнинг ер ва табиий ресурслардан оқилона фойдаланишини таъминлайдиган анъанавий ва инклюзив бошқарув шакли ривожлантирилади.
Марҳабо Ҳожиакбарова, ЎзА
