Сунъий интеллект ва илғор технологияларни ривожлантириш масалалари кўриб чиқилди
Рақамли технологиялар вазири Шерзод Шерматов Корея Республикасининг Ўзбекистондаги Фавқулодда ва Мухтор Элчиси Вон До Ён билан учрашди.
Мулоқот давомида икки мамлакат ўртасида сунъий интеллект, рақамли таълим, робототехника ва рақамли ҳукумат йўналишларидаги ҳамкорликни кенгайтириш, шунингдек, истиқболли ташаббусларни амалга ошириш масалаларига алоҳида эътибор қаратилди.
Учрашувда 2026 йил сентябрь ойида икки давлат раҳбарлари иштирокида ўтказилган «Марказий Осиё — Корея Республикаси» саммитида илгари сурилган ташаббусларни амалга ошириш бўйича навбатдаги қадамлар муҳокама қилинди.
Хусусан, Ўзбекистонда сунъий интеллект технологияларини ривожлантириш, илмий тадқиқотлар ва ишланмалар (R&D) фаолиятини кенгайтириш ҳамда ушбу жараёнга Кореянинг етакчи олий таълим муассасаларини жалб этиш имкониятлари кўриб чиқилди.
Шунингдек, Сеул миллий университети билан ҳамкорликни йўлга қўйиш бўйича дастлабки мулоқотлар олиб борилаётгани қайд этилди. Бу эса илмий салоҳиятни ошириш, замонавий технологияларни ўзлаштириш ва янги ишланмаларни амалиётга татбиқ этиш учун муҳим имкониятлар яратиши мумкин.
Томонлар робототехника ҳамда саноат тармоқларига сунъий интеллект технологияларини жорий этиш борасидаги ҳамкорлик истиқболларини ҳам муҳокама қилдилар.
Мазкур йўналишлардаги ҳамкорлик ишлаб чиқариш жараёнларини такомиллаштириш, инновацион ечимларни кенг жорий этиш ва замонавий технологиялардан самарали фойдаланиш учун янги имкониятлар очиши мумкин.
Учрашувда аҳолининг, айниқса, ёшларнинг сунъий интеллект бўйича билим ва кўникмаларини ошириш масаласига ҳам алоҳида урғу берилди. Шу нуқтаи назардан, «Беш миллион сунъий интеллект етакчилари» лойиҳаси доирасида Кореянинг онлайн курсларини жорий этиш имкониятлари кўриб чиқилди.
Бундай ташаббуслар ёшларнинг замонавий технологияларни ўзлаштириши, рақамли иқтисодиёт талабларига мос билим ва кўникмаларни эгаллаши ҳамда халқаро тажрибадан фойдаланишига хизмат қилиши мумкин.
Учрашув якунида томонлар муҳокама қилинган ташаббусларни изчил амалга ошириш, тегишли ташкилотлар ўртасидаги мулоқотни давом эттириш ва Ўзбекистон — Корея рақамли ҳамкорлигининг янги йўналишларини ривожлантириш бўйича келишиб олдилар.
Мазкур мулоқот икки мамлакат ўртасида илғор технологиялар, инновациялар ва рақамли таълим соҳаларидаги ҳамкорликни мустаҳкамлаш йўлидаги муҳим қадамлардан бири ҳисобланади.
Нигора Раҳмонова, ЎзА
