Россия ва Украина: 40 кунлик ҳужум ҳисоботи
Украина хавфсизлик хизмати маълумотига кўра, Президент Владимир Зеленский томонидан 25 июнь куни тасдиқланган кенг кўламли амалиётдан кўзланган асосий мақсад Россиянинг ҳарбий ва иқтисодий қудратини мунтазам равишда заифлаштириб, рақибни урушни тўхтатишга мажбур қилишдан иборат.
Идора ахборотида айтилишича, РФ ҳудудидаги 100 дан ортиқ стратегик иншоот ҳамда фронт чизиғидаги 21 000 дан зиёд ҳарбий техника, қурол-яроқ ва инфратузилма объектига зарба берилган. Шунингдек, 5 000 га яқин россиялик ҳарбий хизматчи йўқ қилинган.
Ҳисоботда амалиётнинг асосий йўналиши рус ёнилғи-энергетика тизимини ишдан чиқариш экани алоҳида қайд этилган. Охирги 40 кун давомида 14 нефтни қайта ишлаш заводи, ўнлаб нефть базаси, сақланган захира, насос станциялари, нефть терминаллари ва хом ашё қазиб олиш майдони нишонга олинган. Қолаверса, “Blue”, “Louise-1”, “Banda” ва “Avero” танкерларига, халқаро санкцияга тушган икки юк кемасига ҳам ҳужум қилинган.
Махсус хизмат масъуллари Россия ҳарбий-иқтисодий имкониятини чеклашга қаратилган бундай амалиёт изчил давом этишини билдирган.
Ф.Яхшибоева, ЎзА
