Қорақалпоғистон делегацияси Хитой давлатида
Қорақалпоғистон Республикаси Жўқорғи Кенгеси раиси Аманбай Оринбаев раҳбарлигидаги Қорақалпоғистон делегацияси Хитой Халқ Республикасига амалий ташриф билан борди.
Ташрифнинг биринчи кунида Ўзбекистон - Хитой савдо-иқтисодий ва инвестицион ҳамкорлик бизнес-форуми ўтказилди. Унда Шинжон-Уйғур автоном райони халқ ҳукумати раисининг ўринбосари Чжу Лифан билан учрашув ўтказилиб, Президентимизнинг Қорақалпоғистонга алоҳида эътибори билан инвесторлар учун яратилган шароитлар ҳақида маълумот берилди.
Мулоқотда табиий ресурсларни қайта ишлаш, транспорт ва логистика, қишлоқ хўжалиги ва чорвачилик йўналишларида лойиҳаларни амалга ошириш бўйича дастлабки келишувларга эришилди.
Шундан сўнг делегациянинг “China railway construction heavy industry Co., Ltd.” компанияси бош директори ўринбосари Хиао Эвен билан учрашуви ўтказилиб, унда Нукус шаҳрида қишлоқ хўжалиги техникаларини йиғиш ва сервис хизматларини йўлга қўйиш бўйича меморандум имзоланди.
Шунингдек, “Xinjiang Zhongtai Chemical Co., Ltd.” компанияси Бош директори Ма Венюй билан биргаликда Қорақалпоғистонда каустик сода ва поливинилхлорид маҳсулотларини ишлаб чиқаришни йўлга қўйиш ҳамда “Қуруқ порт” мақомига эга бўлган Орол логистика марказини ташкил этиш масалалари кўриб чиқилди.
“Xinjiang Goldwind Science & Technology Co., Лтд.” компанияси Бош директори ўринбосари Чен Жун томонидан амалга оширилаётган шамол электр станциялари учун мачта ишлаб чиқариш лойиҳасини жадаллаштириш масалалари муҳокама қилинди. “Tian feng” корхонаси билан бўлган учрашувда 40 миллион АҚШ доллари бўлган пахта етиштириш шартномаси имзоланди.
Шунингдек, чорва озуқа базасини яхшилаш, тош кукунидан панель, қурилиш материаллари, кабель, қишлоқ хўжалиги техникалари ишлаб чиқариш ва бошқа лойиҳалар бўйича музокаралар олиб борилди.
Қорақалпоғистон делегациясининг Хитой давлатига ташрифи давом этмоқда.
Довуд Абибуллаев, ЎзА
