Путин Россиядан рубль ва олтин олиб чиқишни чеклади (+видео)
Дунё кун тартибида кескин ва турли йўналишдаги воқеалар жамланмоқда: АҚШ президенти Дональд Трамп Эрон билан урушни яқин ҳафталарда якунлашга уринаётган бир пайтда, Япония мактабларида юзлаб одамлар заҳарланиши, Қозоғистонда номаълум дронлар қулашда давом этаётгани хавотир уйғотмоқда. Россияда эса рубль ва олтин олиб чиқишга янги чекловлар жорий этилди, Беларусь етакчиси илк бор Шимолий Кореяга ташриф буюриб, ҳамкорликни кенгайтиришга киришди. Шу фонда Украина президенти Владимир Зеленский АҚШнинг босими кучайганини айтса, Бангладешда автобус дарёга қулаб, ўнлаб инсонлар ҳалок бўлган фожиа қайд этилди.
<iframe width="650" height="420" src="https://www.youtube.com/embed/7ubQ7nf0uBU" title="Putin Rossiyadan rubl va oltin olib chiqishni chekladi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Трамп урушни май ойигача тугатишни режалаштирмоқда
АҚШ президенти Дональд Трамп ўз маслаҳатчиларига Эрон билан урушни тезроқ якунлаш ниятида эканини билдирган. The Wall Street Journal маълумотига кўра, уруш бошланганига бир ой тўлар экан, президент можаро якуний босқичга кирганини айтган ва уни 4–6 ҳафта ичида тугатиш бўйича аввал белгиланган муддатга амал қилишни сўраган. Шу билан бирга, Трамп май ойи ўрталарида Хитой раҳбари Си Цзиньпин билан саммит ўтказишни режалаштирмоқда, уруш сабаб кечиктирилган мазкур учрашувни айнан шу муддатгача якунлаш мақсад қилинган. Бироқ тинчлик музокаралари ҳали бошланғич босқичда бўлиб, урушни тугатишнинг осон йўллари мавжуд эмас.
Япония мактабларида 600 дан ортиқ ўқувчи ва ходим заҳарланди
Япониянинг Осака префектурасида жойлашган бир нечта мактабда 600 дан ортиқ ўқувчи ва ходим овқатдан заҳарланган. Синьхуа хабарига кўра, Куматори шаҳридаги саккизта бошланғич ва ўрта мактабда 19 мартдан бошлаб ўқувчиларда кўнгил айниши, ич кетиши ва қусиш аломатлари кузатилган. 24 март ҳолатига заҳарланганлар сони 633 нафарга етган. Маҳаллий соғлиқни сақлаш маркази айрим беморларда норовирусни аниқлаган, ушбу вирус мактабларга тушлик учун нон етказиб берган компания ходимларида ҳам топилган. Мутасаддилар заҳарланиш айнан шу маҳсулот билан боғлиқ деган хулосага келиб, ишлаб чиқарувчи корхона фаолиятини беш кунга тўхтатган.
Қозоғистон ғарбида дрон қулаб тушди
Қозоғистоннинг ғарбий ҳудудида, Қоровултобе қишлоғи яқинида номаълум дрон қулаб тушгани аниқланди. «Казинформ» хабарига кўра, Оқжайиқ туманида дрон қолдиқларига ўхшаш жисмлар топилган ва ҳодиса юзасидан ваколатли хизматлар билан биргаликда текширув олиб борилмоқда. Полиция маълум қилишича, объект аҳоли пунктидан ташқарида аниқланган бўлиб, воқеа тафсилотлари ўрганилмоқда. Аввалроқ ҳам Ғарбий Қозоғистон вилоятининг турли туманларида номаълум дронлар топилгани ҳақида хабарлар тарқалган эди. Айрим қурилмалар бутун ҳолда аниқланиб, ташқи кўриниши Россиянинг «Шаҳед» туридаги аппаратларига ўхшаш экани қайд этилган. Қозоғистон Мудофаа вазирлиги маълумотига кўра, бундай дронларнинг аксарияти Россия синов полигони ҳудудига тўғри келади ва мазкур ҳаво ҳудудидан айнан шу полигон фойдаланади.
Путин Россиядан рубль ва олтин олиб чиқишни чеклади
Россия президенти Владимир Путин имзолаган фармонга кўра, 2026 йил 1 апрелдан бошлаб жисмоний шахслар Евросиё иқтисодий иттифоқи мамлакатларига 100 минг доллардан ортиқ нақд рубль олиб чиқолмайди. Якка тартибдаги тадбиркорлар ва юридик шахслар учун эса нақд пулни поезд ёки автомобиль орқали олиб чиқиш тақиқланиб, фақат халқаро аэропортлар орқали олиб чиқишга рухсат берилади. Шунингдек, барча шахслар пул маблағининг келиб чиқишини банк ҳужжатлари билан тасдиқлаши ва ундан чет элда қандай фойдаланишини декларацияда кўрсатиши шарт бўлади. Фармонга мувофиқ, олтин олиб чиқиш тартиби ҳам қатъийлаштирилмоқда. 2026 йил 1 майдан бошлаб оғирлиги 100 граммдан ортиқ олтин қуймаларини юридик шахслар ва тадбиркорлар фақат махсус рухсатнома асосида ва айрим аэропортлар орқали олиб чиқиши мумкин
Лукашенко илк бор КХДРга ташриф буюрди
Беларусь раҳбари Александр Лукашенко 25 март куни Шимолий Кореяга ташриф буюрди. Реутерс хабарига кўра, бу унинг КХДРга илк бор бориши бўлиб, ташриф давомида Минск ва Пхеньян ўртасида дўстлик ва ҳамкорлик тўғрисидаги шартнома ҳамда бир нечта соҳавий келишувлар имзоланиши кутилмоқда. Томонлар санкциялар ва халқаро яккаланиш шароитида икки давлат ўртасидаги ҳамкорликнинг ҳуқуқий асосларини кенгайтиришни режалаштирмоқда. Маълумотларга кўра, Беларусь ва КХДР Россиянинг Украинадаги уруши фонида Москва билан яқин ҳамкорликни давом эттирмоқда. Шимолий Корея Россияга ҳарбий ёрдам кўрсатаётгани, Беларусь эса ўз ҳудудидан ҳарбий мақсадларда фойдаланишга рухсат бергани қайд этилади.
Зеленский АҚШнинг Украинага босими кучайганини айтди
Украина президенти Владимир Зеленский Реутерсга берган интервьюсида АҚШ Киевга босимни кучайтираётганини маълум қилди. Унинг айтишича, Вашингтон тинчлик келишуви доирасида хавфсизлик кафолатларини Украина томонидан Россияга ҳудудий ён беришлар билан боғламоқда ва Донбассдан қўшинларни тўлиқ олиб чиқишни талаб қилмоқда. Зеленскийга кўра, АҚШ президенти Дональд Трамп урушни тезроқ якунлашга интиляпти ва бу қарорлар Яқин Шарқдаги вазият билан ҳам боғлиқ. Зеленский Донбассдан чиқиш Украина ва Европа хавфсизлигига жиддий таҳдид солишини таъкидлаб, минтақадаги муҳим мудофаа позициялари йўқотилиши мумкинлигидан огоҳлантирди
Бангладешда автобус йўловчилари билан дарёга қулади
Бангладешда 40 нафарга яқин йўловчини олиб кетаётган автобус Падма дарёсига қулаб тушди. Реутерс хабарига кўра, ҳодиса 25 март куни автобус паромга чиқаётганида, Дакка шаҳридан қарийб 100 километр узоқликдаги Ражбари туманида юз берган. Транспорт воситаси бошқарувни йўқотиб ағдарилган ва тахминан 9 метр чуқурликка чўкиб кетган. Қутқарувчилар сув остидаги автобусдан 22 кишининг жасадини олиб чиққан, кейинчалик ҳалок бўлганлар сони 24 нафарга етгани тасдиқланган. Қидирув-қутқарув ишларига ёнғин хавфсизлиги хизмати, ғаввослар, армия, полиция ва бошқа тузилмалар жалб қилинган. Расмийлар яна бедарак йўқолганлар бўлиши мумкинлигини билдирмоқда, мамлакатда эса бундай йўл-транспорт ва паром ҳалокатлари тез-тез учраб туради.
Нозимбек Мардонов, Салим Обиджонов ЎзА
