Беларусь ва Шимолий Корея “дўстлик ва ҳамкорлик” шартномасини имзолади (+видео)
Беларусь президенти Александр Лукашенко Шимолий Кореяга илк бор расмий ташриф билан борди. Пхеньянда уни Ким Чен Ин тантанали тарзда кутиб олди, деб хабар берди Euronews.
Учрашув давомида икки давлат “дўстлик ва ҳамкорлик” ҳақида шартнома имзолади. Беларусь ташқи ишлар вазири Максим Рыженковнинг айтишича, томонлар қишлоқ хўжалиги, ахборот технологиялари ва бошқа соҳаларда ҳамкорлик қилишга келишиб олган.
Ҳозирча икки давлат ўртасидаги савдо ҳажми катта эмас. Лекин Беларусь Шимолий Кореяга дори-дармон ва озиқ-овқат экспорт қилишни режалаштирмоқда. Ўз навбатида, Шимолий Корея Беларусга арзон ва сифатли косметика маҳсулотлари етказиб бериши мумкин.
Ҳар икки давлат Ғарб санкциялари остида ва инсон ҳуқуқларини бузишда айбланади. Шунингдек, улар Россиянинг Украинадаги урушини қўллаб-қувватламоқда.
Таҳлилчиларга кўра, бу ташрифнинг асосий мақсади — Ғарбга қарши позициядаги давлатлар ўртасида ҳамжиҳатликни кўрсатиш.
Лукашенко ва Ким Чен Ин ўз чиқишларида Ғарб давлатларини халқаро ҳуқуқни бузиш ва босим ўтказишда айблади.
Уларнинг фикрича, ҳозирги кунда мустақил давлатлар ўз суверенитетини ҳимоя қилиш учун бир-бири билан яқинроқ ҳамкорлик қилиши керак.
Сўнгги вақтларда Украина ва Яқин Шарқдаги урушлар жараёнида бундай давлатлар ўртасидаги ҳамкорлик кучаймоқда. Бу жараён Си Цзиньпин ва Владимир Путин илгари сураётган “кўп қутбли дунё” ғояси билан ҳам боғланади.
2024 йилда Россия ва Шимолий Корея стратегик шериклик шартномасини имзолаган. Унга кўра, агар томонлардан бирига ҳужум қилинса, иккинчиси ҳарбий ва бошқа ёрдам кўрсатиши керак.
Таҳлилчиларнинг фикрича, Шимолий Корея Россиядан молиявий ёрдам, ҳарбий технологиялар, озиқ-овқат ва энергия ресурслари олмоқда. Бу эса унинг Хитойга бўлган қарамлигини камайтиради. Шимолий Корея ўз навбатида Россияга минглаб аскарлар, шунингдек снарядлар ва ракеталар юборган.
<iframe width="650" height="420" src="https://www.youtube.com/embed/nnhxB8zonyA" title="Belarus va Shimoliy Koreya “do`stlik va hamkorlik” shartnomasini imzoladi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Салимжон Обиджонов, ЎзА
