Покистондаги кўчкидан кейин таниқли британиялик альпинист ҳалок бўлди
Покистонда қутқарувчилар Қорақурум тизмаси Броад чўққисида юз берган кўчкидан кейин йўқолган ўн альпинистдан тўрт нафарининг жасадини топди. Қидирув-қутқарув ишлари давом этяпти. Афсуски, оғир об-ҳаво шароити ва нотекис ер амалиётни қийинлаштирмоқда.
Мамлакат Альпинистлар клуби маълумотига кўра, икки марҳумнинг шахси аниқланган – ўмонлик Нодира Ал-Хартий ва непаллик Пур Баҳодур Гурунг. Қолган икки қурбон ҳали расман тасдиқланмаган.
Олти киши ҳамон қидирилмоқда. Улар орасида Британия махсус кучларида хизмат қилган ва халқаро экспедицияга раҳбарлик қилган таниқли альпинист Нирмал Пуржа ҳам бор. “Elite Expeditions” компанияси унинг ҳалок бўлганини тасдиқлади. Таъкидланишича, гуруҳдан ҳеч ким омон қолмаган.
43 ёшли Нирмал 2019 йил атиги олти ой олти кун ичида 8 000 метрдан баланд барча 14 чўққини забт этган машҳур инсон. Шунингдек, у К2 илк қишки кўтарилишида ҳам иштирок этган. Пуржанинг жаҳоншумул фаолияти “Netflix” томонидан ишланган “14 чўққи: ҳеч нима имконсиз эмас” ҳужжатли фильмига асос бўлган.
С.Раҳимов, ЎзА
