Вашингтонда йирик ўрмон ёнғини: 60 минг одам кўчирилди
Вашингтон штати Спокане туманида авж олган кенг кўламли ўрмон ёнғини туфайли 60 мингга яқин аҳоли уйини тарк этишга мажбур бўлди. “Reuters” хабарига кўра, олов аллақачон камида 600 бино ва иншоотни вайрон қилган.
Штатнинг иккинчи йирик шаҳри ҳисобланган Спокане яқинидаги ёнғин дам олиш кунлари тобора кенгайиб, атиги бир неча кун ичида 21 квадрат километрдан зиёд майдонни эгаллади. Губернатор Боб Фергюсон Президент Дональд Трамп билан телефон орқали вазиятни муҳокама қилиб, офатга қарши курашда федерал ҳукуматдан қўшимча ёрдам сўради.
Маълум қилинишича, давлат раҳбари вазиятдан хабардор бўлиб, аҳоли учун қайғураётганини билдирган ҳамда федерал кўмак ажратилишига ваъда берган. Бунгача офат ҳудудига Миллий гвардия бўлинмалари сафарбар этилган эди. Ҳозир Вашингтон бўйлаб ёнғин майдони 1000 квадрат километрга етган, олов ўчоқларини ўчириш ишлари ҳамон давом этмоқда.
Ф.Яхшибоева, ЎзА
