Пиёзни қайта ишлашда янги босқич
Юртимизда озиқ-овқат хавфсизлигини таъминлаш ва қишлоқ хўжалиги маҳсулотларини чуқур қайта ишлаш орқали қўшимча қиймат яратиш борасида тизимли ишлар амалга оширилмоқда.
Хусусан, “BMB Holding” таркибидаги “BMB Agro Plus” корхонаси бу йўналишда илғор тажрибаларни қўллаган ҳолда, айни кунларда пиёз маҳсулотларини қуритиш жараёнини юқори суръатларда олиб бормоқда.
Замонавий технологиялар билан жиҳозланган корхонада етиштирилган ҳосил дастлаб қатъий назорат асосида сараланиб, сўнг махсус автоматлаштирилган ускуналарда ювилади ва бир хил ўлчамда тўғралади. Қуритиш жараёнида маҳсулотнинг табиий таъми, ранги ва таркибидаги фойдали микроэлементларини сақлаб қолишга алоҳида эътибор қаратилмоқда.
Бундай тайёр маҳсулот нафақат ички бозорни сифатли хомашё билан таъминлаш, балки экспорт салоҳиятини оширишда ҳам муҳим аҳамиятга эга. Зеро, қуритилган маҳсулотлар ташиш учун қулайлиги ва узоқ муддат сифатини сақлаши билан хорижий ҳамкорларда катта қизиқиш уйғотмоқда.
“BMB Agro Plus” жамоасининг бундай инновацион ёндашуви ҳудуд иқтисодиётини юксалтириш билан бирга, маҳаллий маҳсулотларимизнинг жаҳон бозоридаги нуфузини янада мустаҳкамлашга хизмат қилади.
Абдужалол Қаюмов, ЎзА мухбири
