Өзбекстан мен Түркия сот сараптамасы саласындағы ынтымақтастықты нығайтады
Өзбекстан мен Түркия қауіпсіздік пен құқық тәртібін қамтамасыз ету, сот-құқық жүйесін жетілдіру және заманауи технологияларды енгізу бағытында ынтымақтастықты кеңейтуде.
Осы орайда Өзбекстан Ішкі істер министрлігінде Түркия Әділет министрінің орынбасары Седат Аййылдиз бастаған делегациямен кездесу өтті.
Ішкі істер министрінің орынбасары Зуфар Қурбановпен өткен кездесуде екі елдің сот-құқық саласындағы ынтымақтастығын нығайту, «Цифрлық сот» тәжірибесі, сот сараптамасы және құқық салаларына жасанды интеллект технологияларын енгізу жөнінде тәжірибе алмасу мәселелері талқыланды.
Кездесуде Өзбекстан мен Түркия басшыларының күш-жігерінің нәтижесінде екіжақты қарым-қатынастар стратегиялық серіктестік деңгейіне көтерілгені, қауіпсіздік пен құқық тәртібі саласындағы ынтымақтастықтың дәйекті дамып келе жатқаны атап өтілді.
Түркия делегациясының жетекшісі Седат Аййылдиз сапардың басты мақсаты Өзбекстандағы сот-сараптама қызметін зерделеу, өзара тәжірибе алмасу және салалық ынтымақтастықты кеңейту екенін айтты.

Түркия Әділет министрлігі жүйесінде сот сараптамасын дамыту, жұмыс үдерістерін цифрландыру және жасанды интеллект технологияларын енгізу бағытында атқарылып жатқан жұмыстар туралы мәлімет берілді.
Атап айтқанда, Сот медицинасы мекемесінде химия, биология, ДНҚ, физика және цифрлық криминалистика бағыттары бойынша зерттеулер жүргізілетіні, «UYAP» сот-құқықтық ақпараттық жүйесі арқылы жұмыс үдерістері автоматтандырылып, электрондық құжат алмасу қамтамасыз етілетіні айтылды.
Өз кезегінде Өзбекстанда сараптама-криминалистика саласында жүргізіліп жатқан реформалар мен ІІМ Сараптама-криминалистика бас орталығының қызметі туралы ақпарат ұсынылды.
Ішкі істер органдарының сараптама-криминалистика қызметінің тарихы Самарқанд қаласында құрылған дактилоскопиялық ғылыми-техникалық кабинетінен бастау алады. Бүгінде бұл жүйе заманауи ғылыми-техникалық мүмкіндіктерге ие. Ол оқиға орындарынан іздер мен заттай дәлелдерді анықтау, сот сараптамаларын жүргізу, сондай-ақ бет-бейнесі, саусақ іздері мен ДНҚ деректері бойынша криминалистикалық ақпарат базаларын қалыптастыру және жүргізу сияқты маңызды міндеттерді атқарады.

Саладағы реформалардың басым бағыттары цифрландыру, автоматтандыру және ақпараттандыру екені, заманауи технологиялар мен криминалистикалық ақпараттық жүйелерді жетілдіру жұмыстары жалғасып жатқаны атап өтілді.
Кездесу қорытындысында тараптар цифрлық криминалистика, биометриялық сәйкестендіру, ДНҚ талдауы, сараптамалық зерттеулерді электронды басқару және жасанды интеллектіні қолдану бағыттарында тәжірибе алмасу, сондай-ақ бірлескен семинарлар өткізу мен мамандардың біліктілігін арттыру мүмкіндіктерін қарастырды.
Бұл кездесу Өзбекстан мен Түркия арасындағы сот-сараптама саласындағы ынтымақтастықты нығайтуға, озық тәжірибе алмасуға және заманауи технологияларды тәжірибеге енгізуге ықпал етеді.